સુરતની ઔરો યુનિવર્સિટી ખાતે યોજાઈ રહેલી ‘વાઇબ્રન્ટ ગુજરાત રિજનલ કોન્ફરન્સ – સાઉથ ગુજરાત’ અંતર્ગત ગુજરાત પ્રવાસન વિભાગ દ્વારા તા. 1 થી 5 મે 2026 દરમિયાન વિશેષ થીમ પેવેલિયનનું આયોજન કરવામાં આવ્યું છે. દક્ષિણ ગુજરાતની સંસ્કૃતિ, કુદરતી સૌંદર્ય અને પ્રવાસન સંભાવનાઓને જીવંત રીતે રજૂ કરતું આ પેવેલિયન મુલાકાતીઓ માટે આકર્ષણનું કેન્દ્ર બની ગયું છે.

આ પેવેલિયનમાં દક્ષિણ ગુજરાતના પ્રખ્યાત પ્રવાસન સ્થળો, આદિવાસી સંસ્કૃતિ અને કુદરતી ધરોહરને આધુનિક ટેક્નોલોજી દ્વારા સુંદર રીતે પ્રસ્તુત કરવામાં આવી છે. મુલાકાતીઓ અહીં એક જ સ્થળે દક્ષિણ ગુજરાતના વૈવિધ્યસભર અનુભવનો આનંદ માણી શકે છે. પેવેલિયનનો મુખ્ય ઉદ્દેશ રાજ્યના પ્રવાસન ક્ષેત્રને વધુ પ્રોત્સાહન આપવાનો અને સ્થાનિક સંસ્કૃતિને વૈશ્વિક મંચ પર પહોંચાડવાનો છે.

પ્રદર્શનની વિશેષતા તરીકે પરંપરાગત હસ્તકલા કારીગરો દ્વારા જીવંત પ્રદર્શન યોજાઈ રહ્યા છે. કારીગરો પોતાના હાથે વિવિધ હસ્તકલા બનાવતા દેખાઈ રહ્યા છે, જેના કારણે મુલાકાતીઓને કળાની અસલ પ્રક્રિયા જોવા મળી રહી છે. આ સાથે જ સ્થાનિક કળાઓને પ્રોત્સાહન આપવાનો પણ સકારાત્મક પ્રયાસ થઈ રહ્યો છે.

પેવેલિયનમાં જોડીયા પાવા જેવા પરંપરાગત ગુજરાતી સંગીત વાદ્યો દ્વારા જીવંત સંગીત પ્રસ્તુતિઓ પણ યોજાઈ રહી છે, જે સમગ્ર વાતાવરણને વધુ જીવંત અને આકર્ષક બનાવી રહી છે. સંગીત અને કળાના આ સમન્વયથી મુલાકાતીઓને એક અનોખો સાંસ્કૃતિક અનુભવ મળી રહ્યો છે.

આ સમગ્ર આયોજન દક્ષિણ ગુજરાતની સંસ્કૃતિ અને સંભાવનાઓને ઉજાગર કરતું મહત્વપૂર્ણ પ્લેટફોર્મ બની રહ્યું છે. પ્રવાસન વિભાગના આ પ્રયત્નો રાજ્યના પ્રવાસન વિકાસને નવી દિશા આપશે તેમજ સ્થાનિક કારીગરો અને કલાકારોને પણ સારો મંચ પ્રદાન કરશે.