Editor2
રાજકોટ જિલ્લામાં માર્ગ સલામતીને વધુ મજબૂત બનાવવા માટે જિલ્લા કલેક્ટરશ્રી ડો. ઓમ પ્રકાશના અધ્યક્ષસ્થાને જિલ્લા માર્ગ સલામતી સમિતિની મહત્વપૂર્ણ બેઠક યોજાઈ હતી. આ બેઠકમાં શહેર તેમજ જિલ્લામાં વધતા માર્ગ અકસ્માતોને અટકાવવા અને ટ્રાફિક નિયમોના કડક અમલ માટે વિવિધ મહત્વપૂર્ણ નિર્ણયો લેવામાં આવ્યા હતા.
બેઠક દરમિયાન જિલ્લા કલેક્ટરશ્રીએ નંબર પ્લેટ વગર વાહન ચલાવનારા વાહન માલિકો સામે તાત્કાલિક અને કડક કાર્યવાહી કરવા સૂચના આપી હતી. ઉપરાંત કારમાં ગેરકાયદેસર રીતે બ્લેક ફિલ્મ લગાડનારા વાહન ચાલકો સામે કાર્યવાહી કરવા તેમજ આવા બ્લેક ફિલ્મના વેચાણકર્તાઓ વિરુદ્ધ ખાસ ડ્રાઇવ યોજવા માટે સંબંધિત વિભાગોને આદેશ આપવામાં આવ્યા હતા. હાઈવે અને મુખ્ય માર્ગો પર અતિશય તેજસ્વી એલઈડી લાઇટ લગાવી વાહન ચલાવનારાઓથી અન્ય વાહનચાલકોને થતી અસુવિધા અને અકસ્માતની શક્યતા ધ્યાનમાં રાખીને તેમના વિરુદ્ધ પણ કડક કાર્યવાહી કરવા સ્પષ્ટ સૂચનાઓ આપવામાં આવી હતી.
જિલ્લા કલેક્ટરશ્રીએ જણાવ્યું હતું કે માર્ગ સલામતી માત્ર સરકારી જવાબદારી નથી, પરંતુ દરેક નાગરિકની સામૂહિક જવાબદારી છે. ટ્રાફિક નિયમોનું પાલન કરીને જ માનવ જીવન બચાવી શકાય છે. તેમણે માર્ગ સલામતી માટે પોલીસ, આરટીઓ, નગરપાલિકા અને માર્ગ તથા મકાન વિભાગ વચ્ચે વધુ સંકલન સાથે કામગીરી કરવાની જરૂરિયાત પર ભાર મૂક્યો હતો.
બેઠક દરમિયાન ‘‘રાહવીર યોજના’’ અંતર્ગત માર્ગ અકસ્માતમાં ઇજાગ્રસ્ત નાગરિકોને તાત્કાલિક મદદરૂપ થયેલા ચાર નાગરિકોને જિલ્લા કલેક્ટરશ્રીના હસ્તે પ્રમાણપત્ર આપી સન્માનિત કરવામાં આવ્યા હતા. આ ચારેય નાગરિકોએ માનવતા અને સામાજિક જવાબદારીનું ઉત્તમ ઉદાહરણ પૂરું પાડ્યું છે. રાજ્ય સરકાર દ્વારા આ નાગરિકોને પ્રોત્સાહનરૂપે રૂ. ૨૫,૦૦૦/-ની રાશિ પ્રતિ નાગરિક તેમના બેંક ખાતામાં સીધી જમા કરવામાં આવશે.
કલેક્ટરશ્રીએ વધુમાં જણાવ્યું હતું કે ‘‘રાહવીર યોજના’’નો હેતુ અકસ્માત સમયે લોકોમાં મદદ કરવાની ભાવના વિકસાવવાનો છે, જેથી સમયસર મદદ મળવાથી અનેક અમૂલ્ય જીવ બચાવી શકાય. જિલ્લા વહીવટીતંત્ર દ્વારા માર્ગ સલામતી અંગે સતત જાગૃતિ અભિયાન હાથ ધરવામાં આવશે.
આ બેઠકમાં પોલીસ વિભાગ, આરટીઓ, માર્ગ અને મકાન વિભાગ તથા અન્ય સંબંધિત અધિકારીઓ ઉપસ્થિત રહ્યા હતા. રાજકોટ જિલ્લામાં માર્ગ સલામતી માટે લેવામાં આવેલા આ નિર્ણયો આવનારા સમયમાં અકસ્માત ઘટાડવામાં મહત્વપૂર્ણ સાબિત થશે.
