જામનગર જિલ્લાના સર્વાંગી વિકાસ અને ચાલી રહેલા વિવિધ વિકાસ પ્રકલ્પોની પ્રગતિની સમીક્ષા કરવા માટે જામનગર જિલ્લા સેવા સદન ખાતે મહત્વપૂર્ણ સંકલન બેઠક યોજાઈ હતી. આ બેઠક જામનગર જિલ્લાના પ્રભારી મંત્રી અને વન, પર્યાવરણ, ક્લાઈમેટ ચેન્જ, વિજ્ઞાન અને પ્રૌદ્યોગિકી વિભાગના મંત્રી અર્જુનભાઈ મોઢવાડીયાના અધ્યક્ષસ્થાને યોજાઈ હતી. બેઠકમાં જિલ્લાના વિવિધ વિભાગોના ઉચ્ચ અધિકારીઓ તથા જનપ્રતિનિધિઓ ઉપસ્થિત રહ્યા હતા.

બેઠક દરમિયાન મંત્રી અર્જુનભાઈ મોઢવાડીયાએ જામનગર શહેર અને જિલ્લાના પ્રગતિ હેઠળના વિવિધ વિકાસ કાર્યોની વિગતવાર સમીક્ષા કરી હતી. તેમણે અધિકારીઓને તમામ વિકાસ કાર્યો સમયમર્યાદામાં પૂર્ણ કરવા માટે જરૂરી માર્ગદર્શન આપ્યું હતું. સાથે જ જનપ્રતિનિધિઓ દ્વારા રજૂ કરવામાં આવેલા પ્રશ્નો અને સમસ્યાઓનું ત્વરિત નિરાકરણ લાવવા તેમજ જનહિતના કામોને પ્રાથમિકતા આપવાની સૂચના આપી હતી.

મંત્રીશ્રીએ જણાવ્યું હતું કે રાજ્ય સરકાર જામનગર શહેર અને જિલ્લાના સર્વાંગી વિકાસ માટે પ્રતિબદ્ધ છે. શહેરી વિકાસ વર્ષ 2025-26 હેઠળ જામનગરમાં અનેક મહત્વપૂર્ણ વિકાસ પ્રકલ્પો માટે મોટી રકમનું આયોજન કરવામાં આવ્યું છે. શહેરમાં વધતી ટ્રાફિક સમસ્યાના નિવારણ માટે ફ્લાયઓવર બ્રિજ સહિતના પ્રોજેક્ટને ઝડપથી પૂર્ણ કરવા માટે પણ તેમણે અધિકારીઓને સૂચના આપી હતી.

આ ઉપરાંત તેમણે શહેરની ઐતિહાસિક અને સાંસ્કૃતિક વિરાસત જાળવવા માટે કરવામાં આવતી કામગીરીની પ્રશંસા કરી હતી. ખાસ કરીને ઐતિહાસિક ભુજીયા કોઠાનું પુનઃસ્થાપન અને એમ.પી. શાહ ટાઉનહોલના નવીનીકરણના કામોને મહત્વપૂર્ણ ગણાવ્યા હતા.

જિલ્લાના ગ્રામ્ય વિસ્તારોના વિકાસ અંગે વાત કરતાં મંત્રીશ્રીએ જણાવ્યું હતું કે સુજલામ સુફલામ જળ અભિયાન હેઠળ જિલ્લામાં જળસંચય વધારવા માટે વિવિધ કામગીરી હાથ ધરવામાં આવશે. આગામી ચોમાસામાં પાણી સંગ્રહ ક્ષમતામાં વધારો થાય તે માટે અધિકારીઓને આયોજનબદ્ધ રીતે કામ કરવા સૂચના આપવામાં આવી હતી.

તેમણે જળ જીવન મિશન અને અમૃત 2.0 યોજના હેઠળ દરેક ઘર સુધી શુદ્ધ પીવાનું પાણી પહોંચાડવાની પ્રાથમિકતા પર ભાર મૂક્યો હતો. સાથે જ આરોગ્ય ક્ષેત્રે પંડિત દીનદયાળ ઉપાધ્યાય અને ડો. શ્યામાપ્રસાદ મુખરજી શહેરી સામુહિક આરોગ્ય કેન્દ્રોની સેવાઓ વધુ અસરકારક બનાવવા માટે પણ માર્ગદર્શન આપ્યું હતું.

બેઠકમાં ધારાસભ્યો રાઘવજીભાઈ પટેલ, મેઘજીભાઈ ચાવડા અને હેમંતભાઈ ખવાએ પોતાના વિસ્તારોના વિકાસકાર્યો અને પડતર પ્રશ્નો અંગે રજૂઆતો કરી હતી. મંત્રીશ્રીએ આ તમામ મુદ્દાઓને ગંભીરતાથી લઈ તાકીદે કાર્યવાહી કરવા અધિકારીઓને નિર્દેશ આપ્યા હતા.