જામનગર જિલ્લા માટે ગૌરવની વાત છે કે જિલ્લા કલેક્ટર Ketan Thakkarને તેમની ઉત્તમ વહીવટી કામગીરી બદલ Indian Air Force દ્વારા પ્રતિષ્ઠિત ‘Commendation’ મેડલ એનાયત કરવામાં આવ્યો છે. તા. 23 માર્ચે જામનગર એરફોર્સ સ્ટેશન ખાતે યોજાયેલા એક વિશેષ કાર્યક્રમ દરમિયાન વાયુસેનાના ઉચ્ચ અધિકારીઓના હસ્તે તેમને આ સન્માન સાથે પ્રશસ્તિ પત્ર પણ આપવામાં આવ્યો હતો.

જામનગર એરફોર્સ બેઝ દેશના વ્યૂહાત્મક દૃષ્ટિકોણથી અત્યંત મહત્વ ધરાવે છે. આવી સંવેદનશીલ અને મહત્વપૂર્ણ જગ્યાએ જિલ્લા કલેક્ટર તરીકે કેતન ઠક્કરે સિવિલ વહીવટ અને વાયુસેના વચ્ચે મજબૂત સંકલન સ્થાપિત કરી પ્રશંસનીય કામગીરી કરી છે. તેમના કાર્યકાળ દરમિયાન વિવિધ વહીવટી પ્રક્રિયાઓને ઝડપથી અને અસરકારક રીતે પૂર્ણ કરવામાં મહત્વપૂર્ણ યોગદાન નોંધાયું છે.

ખાસ કરીને આપત્તિ વ્યવસ્થાપન ક્ષેત્રે તેમણે ઉત્તમ નેતૃત્વ પૂરું પાડ્યું છે. વાવાઝોડા, પૂર જેવી કુદરતી આફતો દરમિયાન વાયુસેનાના રાહત અને બચાવ કામગીરીમાં જિલ્લા વહીવટી તંત્ર દ્વારા સમયસર અને અસરકારક સહયોગ ઉપલબ્ધ કરાવવામાં આવ્યો હતો. આ ઉપરાંત સંરક્ષણ ક્ષેત્રના પ્રોજેક્ટ્સમાં આવતાં વહીવટી અવરોધોને દૂર કરવા તેમજ સુરક્ષા સંબંધિત બાબતોમાં ચોકસાઈપૂર્વક આયોજન કરવાની તેમની ક્ષમતા પણ પ્રશંસનીય રહી છે.

આ તમામ કામગીરીને ધ્યાનમાં રાખીને ભારતીય વાયુસેનાએ તેમને આ પ્રતિષ્ઠિત ‘Commendation’ મેડલથી સન્માનિત કર્યા છે, જે તેમની પ્રતિબદ્ધતા અને કાર્યકુશળતાનું પ્રતિબિંબ છે.

આ ગૌરવપૂર્ણ સિદ્ધિ બદલ જિલ્લા વહીવટી તંત્રના વિવિધ વિભાગોના અધિકારીઓ અને કર્મચારીઓ દ્વારા કલેક્ટરશ્રીને હાર્દિક અભિનંદન પાઠવવામાં આવ્યા છે. સમગ્ર જામનગર જિલ્લામાં ખુશીની લાગણી વ્યાપી ગઈ છે અને આ સન્માનને જિલ્લાની પ્રતિષ્ઠામાં વધારો કરનાર ગણવામાં આવી રહ્યો છે.