Editor2
ડાંગ જિલ્લાના ગોંડલવિહીર ગામે રાજ્યપાલ શ્રી Acharya Devvratનો પ્રેરણાદાયી અને જનજાગૃતિભર્યો પ્રવાસ યોજાયો હતો. આ મુલાકાત દરમિયાન રાજ્યપાલશ્રીએ પ્રાકૃતિક ખેતી, પર્યાવરણ સંરક્ષણ, સ્વચ્છતા અભિયાન અને સામાજિક સુમેળ અંગે મહત્વપૂર્ણ સંદેશ આપ્યો હતો.
રાજ્યપાલશ્રીએ ગોંડલવિહીર ગામે એક આદિવાસી પરિવાર સાથે ડાંગી ભોજનનો સ્વાદ માણ્યો હતો, જેનાથી સ્થાનિક લોકોમાં આનંદ અને ગૌરવની લાગણી પ્રસરી ગઈ હતી. તેઓએ શાળાના સામાન્ય ઓરડામાં રાત્રિ વિશ્રામ કરી સાદગી અને સંવેદનશીલતાનો અનોખો સંદેશ આપ્યો હતો. રાત્રિના સમયમાં ગામલોકો સાથે બેઠક યોજી રાજ્યપાલશ્રીએ એકતા, શિક્ષણ અને સંસ્કારોથી સજ્જ આદર્શ ગામ બનાવવા આહ્વાન કર્યું હતું.
તેમણે ગામલોકોને વૃક્ષારોપણ, સ્વચ્છતા અભિયાન, સામાજિક સમરસતા અને નશામુક્ત સમાજ નિર્માણ માટે સંકલ્પબદ્ધ થવા પ્રેરિત કર્યા હતા. “એક પેડ મા કે નામ” અભિયાનને વેગ આપવા રાજ્યપાલશ્રીએ જાતે વૃક્ષારોપણ કર્યું અને હાથમાં ઝાડૂ લઈને સ્વચ્છતા અભિયાનમાં ભાગ લીધો, જેનાથી ગામલોકોમાં નવી ઉર્જા અને જવાબદારીની ભાવના જાગૃત થઈ.
આ ઉપરાંત રાજ્યપાલશ્રીએ ઘુબીતા ગામે પ્રાકૃતિક ખેતી કરતા ખેડૂત દામુભાઈ કાકડભાઈ ભોયેના ખેતરની મુલાકાત લીધી. તેમણે ખેડૂતોને રાસાયણિક ખેતી છોડીને સ્વાભાવિક કૃષિ અપનાવવા પ્રેરણા આપી અને જમીન, પાણી અને પર્યાવરણના સંરક્ષણ માટે પ્રાકૃતિક ખેતીને શ્રેષ્ઠ માર્ગ ગણાવ્યો.
રાજ્યપાલશ્રીના આ પ્રવાસથી ડાંગ જિલ્લામાં પર્યાવરણ પ્રત્યે જાગૃતિ, સ્વચ્છતા પ્રત્યે પ્રતિબદ્ધતા અને સ્વાભાવિક ખેતી પ્રત્યે ઉત્સાહમાં વધારો થયો છે. ગામલોકોએ રાજ્યપાલશ્રીના સંદેશને જીવનમાં ઉતારવાનો સંકલ્પ વ્યક્ત કર્યો હતો.
