ડાંગ જિલ્લાના મુખ્ય મથક આહવાના રંગ ઉપવન ખાતે ભાતીગળ લોકમેળા ‘ડાંગ દરબાર’નો ભવ્યાતિભવ્ય સમારોહ રાજ્યપાલ શ્રી Acharya Devvratની ગરિમામયી ઉપસ્થિતિમાં ઉજવાયો હતો. આ ઐતિહાસિક મહોત્સવ આદિવાસી સમાજની જીવનશૈલી, પ્રકૃતિપ્રેમ, સંસ્કૃતિ અને કલાત્મક વારસાને માણવાનો અણમોલ અવસર બની રહ્યો હતો.

‘ડાંગ દરબાર’માં પરંપરાગત વેશભૂષા, લોકનૃત્યો, સંગીત અને આદિવાસી કળાઓએ સૌનું મન મોહી લીધું હતું. જિલ્લા વહીવટી તંત્ર દ્વારા રાજ્યપાલશ્રીને સ્મૃતિભેટ રૂપે વારલી પેઇન્ટિંગ અને પરંપરાગત તારપુ અર્પણ કરવામાં આવ્યું, જે ડાંગની અનન્ય સાંસ્કૃતિક ઓળખનું પ્રતિક છે. આ પ્રસંગે રાજ્યપાલશ્રીએ આ સન્માન બદલ આભાર વ્યક્ત કર્યો હતો.

રાજ્યપાલશ્રીએ પોતાના સંબોધનમાં ડાંગના માજી રાજવીશ્રીઓની શૌર્યગાથા અને તેમની અખંડ રાષ્ટ્રભક્તિને બિરદાવતાં જણાવ્યું હતું કે રાજા-રજવાડાઓની માતૃભૂમિ પ્રત્યેની અપ્રતિમ ચાહના દેશ માટે સદાય પ્રેરણારૂપ છે. તેમણે કહ્યું કે ‘ડાંગ દરબાર’ જેવો ઐતિહાસિક મહોત્સવ દેશની શૂરવીરતા, શૌર્ય અને આદિવાસી ગૌરવને નવી પેઢી સુધી પહોંચાડે છે.

રાજ્યપાલશ્રીએ ‘પ્રાકૃતિક ડાંગ અભિયાન’ને સફળ બનાવવા બદલ સમગ્ર ડાંગ જિલ્લાને અભિનંદન પાઠવ્યા હતા. પર્યાવરણ સંરક્ષણ, સ્વચ્છતા, શિક્ષણ અને સામાજિક સમરસતાના સંદેશ સાથે તેમણે ડાંગને દેશ માટે આદર્શ જિલ્લો બનવા પ્રેરિત કર્યો હતો.

આ ભવ્ય સમારોહમાં મોટી સંખ્યામાં સ્થાનિક નાગરિકો, આદિવાસી ભાઈ-બહેનો, અધિકારીઓ અને જનપ્રતિનિધિઓ ઉપસ્થિત રહ્યા હતા. સમગ્ર કાર્યક્રમ દેશપ્રેમ, સંસ્કૃતિપ્રેમ અને એકતાના સંદેશ સાથે સફળતાપૂર્વક પૂર્ણ થયો હતો. ‘ડાંગ દરબાર’એ ડાંગ જિલ્લાના ઐતિહાસિક વારસા અને આદિવાસી સંસ્કૃતિને રાષ્ટ્રીય સ્તરે ઉજાગર કરવાની દિશામાં મહત્વપૂર્ણ યોગદાન આપ્યું છે.