ગુજરાતના નાયબ મુખ્યમંત્રી તથા વાહન વ્યવહાર મંત્રી શ્રી હર્ષ સંઘવીએ આનંદ શહેરના નવા બસ સ્ટેન્ડની અચાનક મુલાકાત લઈને જી.એસ.આર.ટી.સી.ની સેવાઓ, સ્વચ્છતા અને મુસાફરોને મળતી સુવિધાઓની સ્થળ પર જઈને સમીક્ષા કરી હતી. કોઈપણ પૂર્વ સૂચના વગર થયેલી આ મુલાકાત દરમિયાન નાયબ મુખ્યમંત્રી સીધા મુસાફરો, વિદ્યાર્થીઓ તેમજ જી.એસ.આર.ટી.સી.ના કર્મચારીઓ સાથે સંવાદમાં જોડાયા હતા.

શ્રી સંઘવીએ બસ સ્ટેન્ડ પર રાહ જોઈ રહેલા મુસાફરો સાથે વાતચીત કરી તેમની સમસ્યાઓ, સૂચનો અને અનુભવ અંગે માહિતી મેળવી. ખાસ કરીને વિદ્યાર્થીઓ સાથે સંવાદ દરમિયાન તેમણે સમયપત્રક, બસોની ઉપલબ્ધતા અને ભાડાં અંગે પૂછપરછ કરી હતી. મુસાફરો દ્વારા જણાવવામાં આવેલી બાબતોને તેમણે ગંભીરતાપૂર્વક સાંભળી અને તાત્કાલિક ઉકેલ માટે અધિકારીઓને જરૂરી સૂચનો આપ્યા હતા.

નાયબ મુખ્યમંત્રી શ્રી હર્ષ સંઘવીએ બસ સ્ટેન્ડની સ્વચ્છતા, પીવાના પાણીની વ્યવસ્થા, બેસવાની સુવિધા, શૌચાલયોની સ્થિતિ તેમજ માહિતી કાઉન્ટર અને ટિકિટ વ્યવસ્થાની પણ વિગતવાર તપાસ કરી હતી. તેમણે જી.એસ.આર.ટી.સી.ના કર્મચારીઓ સાથે ચર્ચા કરીને બસોના સંચાલન, જાળવણી અને સમયસર સેવાઓ અંગે માહિતી મેળવી હતી. સાથે જ કર્મચારીઓને મુસાફરો સાથે સૌજન્યપૂર્ણ વર્તન રાખવા અને સેવા ગુણવત્તા સતત સુધારવા માટે પ્રોત્સાહિત કર્યા હતા.

આ મુલાકાત દરમિયાન આનંદ–બોરસદ રૂટ પર મુસાફરોની સંખ્યા વધુ હોવાની રજૂઆત ધ્યાનમાં લઈને નાયબ મુખ્યમંત્રીએ આ માર્ગ પર નવી બસોની ફાળવણી કરવાનો મહત્વપૂર્ણ નિર્ણય લીધો. તેમણે જણાવ્યું હતું કે પરિવહન સેવા વધુ સ્થિર, સમયસર અને વિશ્વસનીય બને તે માટે રાજ્ય સરકાર સતત પ્રયત્નશીલ છે. જરૂરિયાત મુજબ નવા રૂટ, વધારાની બસો અને આધુનિક સુવિધાઓ ઉપલબ્ધ કરાવવામાં આવશે.

શ્રી હર્ષ સંઘવીએ જણાવ્યું કે જાહેર પરિવહન એ સામાન્ય નાગરિકોના દૈનિક જીવનનો મહત્વપૂર્ણ આધાર છે. જી.એસ.આર.ટી.સી.ની સેવાઓમાં સુધારા દ્વારા મુસાફરોનો વિશ્વાસ વધારવો એ સરકારની પ્રાથમિકતા છે. આનંદના નવા બસ સ્ટેન્ડની આ અચાનક મુલાકાત રાજ્યમાં પરિવહન વ્યવસ્થાને વધુ મજબૂત અને લોકકેન્દ્રી બનાવવા દિશામાં એક મહત્વપૂર્ણ પગલું સાબિત થઈ છે.