Editor2
તા. 21 માર્ચના રોજ ઉજવાતા આંતરરાષ્ટ્રીય વન દિવસના અવસરે સમગ્ર વિશ્વમાં વનોના સંરક્ષણ અને તેના મહત્ત્વ અંગે જાગૃતિ ફેલાવવામાં આવે છે. વર્ષ 2026 માટે આ દિવસની થીમ ‘જંગલો અને અર્થતંત્ર’ રાખવામાં આવી છે, જે જંગલોની આર્થિક સમૃદ્ધિ અને ટકાઉ વિકાસમાં રહેલી મહત્વપૂર્ણ ભૂમિકાને ઉજાગર કરે છે.
આ અવસરે સુરેન્દ્રનગર જિલ્લામાં વિકસાવવામાં આવેલા બે અનોખા સાંસ્કૃતિક વનો ‘ભક્તિ વન’ (ચોટીલા) અને ‘વટેશ્વર વન’ (દૂધરેજ) પ્રકૃતિપ્રેમીઓ અને પ્રવાસીઓ માટે આકર્ષણનું કેન્દ્ર બની રહ્યા છે. રાજ્યના વન વિભાગ દ્વારા આ વનોનું નિર્માણ માત્ર હરિયાળી વધારવા માટે જ નહીં, પરંતુ લોકોમાં પર્યાવરણ પ્રત્યે લાગણીશીલ જોડાણ વધારવા માટે કરવામાં આવ્યું છે.
‘ભક્તિ વન’માં વિવિધ ધાર્મિક અને ઔષધીય વૃક્ષોનું સંરક્ષણ કરવામાં આવ્યું છે, જે લોકોમાં આધ્યાત્મિકતા સાથે પ્રકૃતિનો મહિમા સમજાવે છે. અહીં આવતા મુલાકાતીઓને શાંતિપૂર્ણ વાતાવરણ સાથે આધ્યાત્મિક અનુભૂતિ પણ થાય છે. બીજી તરફ ‘વટેશ્વર વન’માં પ્રાચીન સંસ્કૃતિ અને પરંપરાગત જ્ઞાનને ઉજાગર કરતી વિવિધ વનસ્પતિઓનું સંવર્ધન કરવામાં આવ્યું છે, જે પર્યાવરણ શિક્ષણ માટે મહત્વપૂર્ણ સાબિત થઈ રહ્યું છે.
આ વનોનો મુખ્ય હેતુ લોકોમાં વન સંરક્ષણ પ્રત્યે જાગૃતિ લાવવાનો, પર્યાવરણ શુદ્ધિ પ્રત્યે પ્રેરણા આપવાનો અને પ્રાચીન સંસ્કૃતિ સાથે જોડવાનો છે. સાથે જ, આ સ્થળો સ્થાનિક પર્યટનને પ્રોત્સાહન આપી આર્થિક વિકાસમાં પણ ફાળો આપી રહ્યા છે.
આંતરરાષ્ટ્રીય વન દિવસની ઉજવણી માત્ર એક દિવસ પૂરતી સીમિત નથી, પરંતુ તે આપણા રોજિંદા જીવનમાં પર્યાવરણ સંરક્ષણ માટે પ્રેરણા આપે છે. ‘ભક્તિ વન’ અને ‘વટેશ્વર વન’ જેવા પ્રોજેક્ટો આ દિશામાં એક ઉત્તમ ઉદાહરણ છે, જે પ્રકૃતિ, સંસ્કૃતિ અને અર્થતંત્રને એકસાથે જોડે છે.
