Gujarat સરકાર દ્વારા મહેસૂલી વહીવટને વધુ સરળ, પારદર્શક અને આધુનિક બનાવવા માટે ઐતિહાસિક પહેલ હાથ ધરવામાં આવી છે. “વન સ્ટેટ, વન એક્ટ, વન રૂલ”ના અભિગમ હેઠળ હવે રાજ્યમાં જમીન અને મહેસૂલી વહીવટ સંબંધિત જૂના અને જટિલ કાયદાઓના સ્થાને એક જ સંકલિત અને સ્પષ્ટ કાયદાકીય માળખું લાવવામાં આવશે.

Gandhinagar ખાતે યોજાયેલી ચિંતન શિબિરમાં આ મહત્વપૂર્ણ મુદ્દે વિસ્તૃત ચર્ચા કરવામાં આવી હતી. મહેસૂલી વહીવટમાં સુધારા માટે રચાયેલ સી.એલ. મીના અને જે.કે. અસ્તિક સમિતિની ભલામણો પર ગહન વિચારણા કરવામાં આવી હતી. સમિતિએ વિવિધ જૂના કાયદાઓ, નિયમો અને હજારો પરિપત્રોના સ્થાને સરળ અને એકરૂપ વ્યવસ્થા લાવવાનો સૂચન આપ્યો છે.

રાજ્ય સરકારના આ નિર્ણયથી સામાન્ય નાગરિકોને સૌથી મોટો લાભ મળશે. હાલની જટિલ પ્રક્રિયાઓ અને વિવિધ નિયમોના કારણે ઊભા થતા મહેસૂલી વિવાદો અને કોર્ટ કેસોમાં નોંધપાત્ર ઘટાડો થવાની અપેક્ષા વ્યક્ત કરવામાં આવી રહી છે. પરિણામે લોકોના જમીન સંબંધિત કામો વધુ ઝડપથી અને સરળતાથી પૂર્ણ થઈ શકશે.

આ નવી વ્યવસ્થા રાજ્યમાં “Ease of Living” અને “Ease of Doing Business”ને પણ મજબૂતી આપશે. ઉદ્યોગકારો, રોકાણકારો અને ખેડૂતો માટે જમીન સંબંધિત પ્રક્રિયાઓ વધુ પારદર્શક અને સમયબદ્ધ બનશે, જેનાથી વિકાસકાર્યોને વધુ ગતિ મળશે.

રાજ્ય સરકારનું માનવું છે કે જટિલ કાયદાઓને દૂર કરીને પારદર્શિતા અને ટેક્નોલોજી આધારિત વ્યવસ્થા ઉભી કરવાથી ગુજરાત ભૂમિ વહીવટ ક્ષેત્રે દેશ માટે એક આદર્શ મોડેલ બની શકે છે.

આ પહેલ રાજ્યના સુશાસન અને વહીવટી સુધારાની દિશામાં એક મહત્વપૂર્ણ પગલું માનવામાં આવી રહી છે, જે ભવિષ્યમાં નાગરિક કેન્દ્રિત શાસન વ્યવસ્થાને વધુ મજબૂત બનાવશે.