“આવર ગુજરાત, નેચરલ ગુજરાત”ની સંકલ્પનાને સાકાર કરતી એક અનોખી અને પ્રેરણાદાયક પહેલ વલસાડ જિલ્લાના પારડી તાલુકામાં જોવા મળી છે. પારડીના પ્રગતિશીલ ખેડૂત શ્રી અમિત મકરાણીએ કાલસર ખાતે નવા કે.ડી. કંડારી વિસ્તારમાં કુદરતી ખેતી આધારિત ઉત્પાદનો માટે પ્રથમવાર વિશેષ આઉટલેટની શરૂઆત કરી છે. આ આઉટલેટ મારફતે કુદરત સાથે સુસંગત ખેતીથી તૈયાર થયેલા શુદ્ધ અને મૂલ્યવર્ધિત ખોરાક ઉત્પાદનો સીધા ગ્રાહકો સુધી પહોંચાડવામાં આવી રહ્યા છે.

પરંપરાગત ખેતી પદ્ધતિ છોડીને શ્રી મકરાણીએ કુદરતી ખેતી અપનાવી છે. તેઓ હાલ કુદરતી પદ્ધતિથી ઉગાડેલા હળદર, ચોખા, મગ, ચણા, તુવેર દાળ, હળના પાપડ, અડાણા પાપડ, રોટલા, ટેસ્ટ વોટર, ગાંઠિયા તેમજ ચોખાના લોટ જેવા વિવિધ મૂલ્યવર્ધિત ઉત્પાદનોનું વેચાણ કરે છે. આ ઉત્પાદનો કોઈપણ રસાયણિક ખાતર કે ઝેરી દવાઓ વિના તૈયાર કરવામાં આવતા હોવાથી આરોગ્ય માટે લાભદાયક માનવામાં આવે છે.

ખેડૂત શ્રી અમિત મકરાણીએ જણાવ્યું કે અગાઉ તેઓ માત્ર કાચા કૃષિ ઉત્પાદનોનું વેચાણ કરતા હતા, પરંતુ આત્મા (ATMA) પ્રોજેક્ટ સાથે જોડાયા બાદ તેમને ખેતી ઉત્પાદનમાં મૂલ્યવર્ધન અંગે વિશેષ તાલીમ આપવામાં આવી. આ તાલીમના પરિણામે આજે તેઓ પોતાના ખેતઉત્પાદનોને પ્રોસેસ કરી વધુ આવક મેળવી રહ્યા છે તેમજ સ્થાનિક લોકોને રોજગારની તકો પણ મળી રહી છે.

તેમણે જણાવ્યું કે “કુદરત સાથે સહકાર રાખવો એ જ કુદરતી ખેતી છે. કુદરતી ખેતી દ્વારા માતૃભૂમિની તંદુરસ્તી જળવાઈ રહે છે અને માનવ આરોગ્ય પણ સુરક્ષિત રહે છે.” કુદરતી ખેતીમાં ગાયના છાણ સાથે ઓર્ગેનિક કાર્બન, નાઈટ્રોજન, સોડિયમ, ઝિંક, સલ્ફેટ અને કેલ્શિયમ સહિત કુલ 20 જેટલા પરિમાણોને ધ્યાનમાં રાખીને ઘન જૈવિક ખાતર તૈયાર કરવામાં આવે છે, જેના કારણે જમીનની ફળદ્રુપતા લાંબા ગાળે વધે છે.

આ પહેલથી વલસાડ જિલ્લામાં કુદરતી ખેતીને નવી ઓળખ મળી છે. સાથે જ, ગ્રાહકોને શુદ્ધ, સ્વસ્થ અને પર્યાવરણમિત્ર ખોરાક પ્રાપ્ત થવાથી “નેચરલ ગુજરાત” અભિયાનને પણ મજબૂત આધાર મળ્યો છે.