વાઇબ્રન્ટ ગુજરાત રિજનલ કોન્ફરન્સ (VGRC) સૌરાષ્ટ્ર-કચ્છ અંતર્ગત મોરબી ખાતે આયોજિત કાર્યક્રમમાં ગુજરાતના ઔદ્યોગિક વિકાસની મજબૂત તસવીર સામે આવી. રાજ્યમાં ઉદ્યોગ વિકાસની ગતિ વધારવાના ઉદ્દેશ સાથે સરકાર દ્વારા છેલ્લા બે વર્ષમાં મોરબી જિલ્લાના 1200થી વધુ ઔદ્યોગિક એકમોને ₹460 કરોડથી વધુની નાણાકીય સહાય આપવામાં આવી છે. આ સહાયથી નાના, મધ્યમ અને મોટા ઉદ્યોગોને વિસ્તરણ, આધુનિકીકરણ અને રોજગાર સર્જનમાં નોંધપાત્ર લાભ થયો છે.

આ કાર્યક્રમ દરમિયાન કુલ 50 કંપનીઓ સાથે આશરે ₹2470 કરોડના મૂડીરોકાણ માટેના સમજૂતી કરાર (MoU) કરવામાં આવ્યા. આ રોકાણો મોરબી અને આસપાસના વિસ્તારોમાં નવા ઉદ્યોગો, ઉત્પાદન ક્ષમતા વધારો અને હજારો યુવાનો માટે રોજગારની નવી તકો સર્જશે.

મોરબી જિલ્લો આજે દેશ અને રાજ્યના ઔદ્યોગિક નકશામાં વિશેષ સ્થાન ધરાવે છે. દેશના કુલ સિરામિક ઉત્પાદનોના નિકાસમાં મોરબીનો ફાળો લગભગ 80 ટકા જેટલો છે, જ્યારે ગુજરાતની કુલ સિરામિક ઉત્પાદન ક્ષમતામાં મોરબીનો હિસ્સો આશરે 90 ટકા છે. આ આંકડાઓ મોરબીને “સિરામિક હબ” તરીકેની ઓળખ આપે છે.

તેની સાથે મોરબી જિલ્લો મીઠા ઉત્પાદન ક્ષેત્રે પણ અગ્રણી છે. ગુજરાતમાં કચ્છ જિલ્લા બાદ મોરબી મીઠા ઉત્પાદન માટે બીજા ક્રમે આવે છે, જે રાજ્યના ખનિજ આધારિત ઉદ્યોગોને મજબૂતી આપે છે.

મોરબી “ડ્રેન, બોટમ અને વોચ” માટે ઓળખાય છે. અહીં વોચ ઉદ્યોગ, મીઠા ઉદ્યોગ, પેપર મિલ અને પેકેજિંગ જેવા મહત્વપૂર્ણ ઉદ્યોગો કાર્યરત છે. આ ઉદ્યોગો દ્વારા ગુજરાત સહિત સમગ્ર દેશમાં 8 લાખથી વધુ લોકોને સીધી અને પરોક્ષ રીતે રોજગાર મળી રહ્યો છે.

VGRC સૌરાષ્ટ્ર-કચ્છ અંતર્ગત મોરબીમાં થયેલ આ કાર્યક્રમ રાજ્ય સરકારની ઉદ્યોગલક્ષી નીતિઓ, સહાયક વાતાવરણ અને રોકાણકારોને મળતી સુવિધાઓનું ઉત્તમ ઉદાહરણ છે. આવનારા સમયમાં મોરબી જિલ્લો ગુજરાતના ઔદ્યોગિક વિકાસમાં વધુ મહત્વપૂર્ણ ભૂમિકા ભજવશે.