કચ્છ જિલ્લાની મુલાકાતે આવેલા ગુજરાતના રાજ્યપાલ Acharya Devvrat એ ભુજ તાલુકાના Kodki Village ખાતે ગ્રામ્ય જીવનની સાદગી અને આત્મીયતાનો અનોખો અનુભવ કર્યો હતો. રાજ્યપાલશ્રી કોડકી ગામના રહેવાસી મગનભાઈ મહેશ્વરીના ઘરે પહોંચ્યા હતા, જ્યાં તેમણે પરિવાર સાથે બેઠકો કરી સાદા અને પરંપરાગત ભોજનનો આસ્વાદ માણ્યો હતો.

કચ્છની લોકસંસ્કૃતિ અને ગ્રામ્ય પરંપરાનું પ્રતિબિંબ સમાન આ પ્રસંગે રાજ્યપાલશ્રીએ જુવારના રોટલા, ઘઉંની રોટલી, દૂધી અને મગનું શાક તેમજ છાશ જેવા પૌષ્ટિક અને સાદા ભોજનનો સ્વાદ લીધો હતો. રાજ્યપાલશ્રીની આ સરળતા અને સૌહાર્દભર્યા વર્તનથી ગામલોકોમાં ખુશીની લાગણી વ્યાપી ગઈ હતી. સ્થાનિક લોકો માટે આ મુલાકાત યાદગાર બની રહી હતી.

ભોજન દરમિયાન રાજ્યપાલશ્રીએ મગનભાઈ મહેશ્વરી અને તેમના પરિવારના સભ્યો સાથે આત્મીય વાતચીત કરી હતી. પરિવારના સભ્યોના ખબર-અંતર પૂછતાં તેમણે ગ્રામ્ય જીવન, ખેતી અને પરિવારની પરિસ્થિતિ અંગે માહિતી મેળવી હતી. રાજ્યપાલશ્રીની સહજતા અને માનવીય અભિગમથી પરિવારજનો ભાવવિભોર બન્યા હતા.

આ પ્રસંગે રાજ્યપાલશ્રીએ મગનભાઈના પરિવારને ગાંધીનગર સ્થિત લોકભવન ખાતે ભોજન માટે વિશેષ આમંત્રણ પણ આપ્યું હતું. રાજ્યપાલશ્રીના આ આત્મીય આમંત્રણથી પરિવારજનોમાં આનંદ અને ગૌરવની લાગણી જોવા મળી હતી.

રાજ્યપાલ આચાર્ય દેવવ્રતજી હંમેશા કુદરતી ખેતી, ગ્રામ્ય વિકાસ અને ભારતીય સંસ્કૃતિના મૂલ્યોને પ્રોત્સાહન આપતા રહ્યા છે. કચ્છના ગામમાં સામાન્ય પરિવાર સાથે વિતાવેલો આ સમય તેમની સાદગી અને લોકો સાથેના જોડાણને વધુ મજબૂત બનાવે છે.

કોડકી ગામે યોજાયેલો આ પ્રસંગ માત્ર એક મુલાકાત નહીં પરંતુ રાજ્યપાલશ્રીના લોકસંપર્ક, સાદગી અને ભારતીય ગ્રામ્ય સંસ્કૃતિ પ્રત્યેના સન્માનનું ઉત્તમ ઉદાહરણ બની રહ્યો છે.