Editor2
જામનગર તા. 30 માર્ચ: જામનગર જિલ્લા કલેક્ટરશ્રી કેતન ઠક્કરે સરકારી ડેન્ટલ કોલેજ નજીક આવેલા સખી વન સ્ટોપ સેન્ટરની મુલાકાત લઈને દીકરીઓના સશક્તિકરણ માટે પ્રેરણાદાયક સંદેશ આપ્યો હતો. આ પ્રસંગે તેમણે 11 દીકરીઓને “દીકરી વધામણા કીટ” તેમજ આંગણવાડીની બાળકીઓને એજ્યુકેશન કીટનું વિતરણ કરી તેમના ઉજ્જવળ ભવિષ્ય માટે શુભેચ્છાઓ પાઠવી હતી.
મુલાકાત દરમિયાન કલેક્ટરશ્રીએ સખી વન સ્ટોપ સેન્ટરમાં રહેલ મહિલાઓ સાથે સંવાદ કરી તેમની કામગીરી અને સેવાઓ વિશે વિગતવાર માહિતી મેળવી હતી. તેમણે સંસ્થાના કાર્યની પ્રશંસા કરતા જણાવ્યું હતું કે આ કેન્દ્ર મહિલાઓને સંકટ સમયે સહાય અને સુરક્ષા પૂરી પાડવામાં મહત્વપૂર્ણ ભૂમિકા ભજવે છે.
કલેક્ટરશ્રી કેતન ઠક્કરે દીકરીઓના વાલીઓને સંબોધતા જણાવ્યું હતું કે દરેક દીકરીમાં અપરિમિત શક્તિ અને પ્રતિભા રહેલી છે. યોગ્ય માર્ગદર્શન, શિક્ષણ અને સહયોગ મળે તો દીકરીઓ જીવનમાં ઊંચી સિદ્ધિઓ હાંસલ કરી શકે છે. તેમણે સમાજના દરેક વર્ગને દીકરીઓના શિક્ષણ અને સશક્તિકરણ માટે આગળ આવવાની અપીલ કરી હતી.
આ પ્રસંગે કલેક્ટરશ્રીએ બાળકીઓ સાથે સમય વિતાવ્યો અને તેમને જીવનમાં આગળ વધવા માટે પ્રેરણા આપી હતી. બાળકીઓ સાથેનો તેમનો આત્મીય સંવાદ સમગ્ર કાર્યક્રમને વધુ લાગણીસભર બનાવી ગયો હતો.
મહિલા અને બાળ વિકાસ વિભાગની અધિકારીશ્રી પૂજા ડોડીયા તેમજ સખી વન સ્ટોપ સેન્ટરના સ્ટાફ સભ્યો પણ આ પ્રસંગે ઉપસ્થિત રહ્યા હતા. તમામ ઉપસ્થિતોએ દીકરીઓના ઉત્સાહમાં વધારો કર્યો હતો.
આ કાર્યક્રમ દ્વારા દીકરીઓના શિક્ષણ અને સશક્તિકરણ માટે સકારાત્મક સંદેશ પહોંચ્યો છે, જે સમાજમાં જાગૃતિ લાવવા માટે મહત્વપૂર્ણ સાબિત થશે.
