વડોદરા તા.: જિલ્લામાં નાગરિકોને આવશ્યક ચીજવસ્તુઓ તેમજ પેટ્રોલ-ડીઝલ જેવા ઇંધણનો પૂરતો અને નિયમિત પુરવઠો જળવાઈ રહે તે માટે જિલ્લા કલેક્ટરશ્રી અનિલ ધામેલિયાના અધ્યક્ષસ્થાને જિલ્લા કક્ષાની સમિતિની મહત્વપૂર્ણ બેઠક યોજાઈ હતી. બેઠકમાં વિવિધ વિભાગોના અધિકારીઓ અને પુરવઠા વ્યવસ્થાથી સંકળાયેલા પ્રતિનિધિઓ ઉપસ્થિત રહ્યા હતા.

બેઠક દરમિયાન કલેક્ટરશ્રીએ જિલ્લામાં આવશ્યક ચીજવસ્તુઓના સ્ટોક, વિતરણ વ્યવસ્થા અને ઉપલબ્ધતા અંગે વિગતવાર સમીક્ષા કરી હતી. તેમણે સ્પષ્ટ સૂચનાઓ આપી હતી કે કોઈપણ પરિસ્થિતિમાં નાગરિકોને જરૂરી ચીજવસ્તુઓની અછત ન સર્જાય અને પુરવઠો સતત જળવાઈ રહે તે સુનિશ્ચિત કરવામાં આવે. ખાસ કરીને ઇંધણના પુરવઠામાં કોઈ વિક્ષેપ ન આવે તે માટે પેટ્રોલ પંપ સંચાલકો સાથે સંકલન વધારવા પર ભાર મૂકાયો હતો.

કલેક્ટરશ્રીએ સંગ્રહખોરી અને કાળાબજાર કરનારા તત્વો સામે કડક કાર્યવાહી કરવા પણ સૂચના આપી હતી. તેમણે જણાવ્યું હતું કે આવશ્યક ચીજવસ્તુઓની કૃત્રિમ તંગી ઉભી કરનારાઓ સામે કાયદેસર પગલાં લેવામાં આવશે અને કોઈપણ પ્રકારની ગેરરીતિ સહન કરવામાં નહીં આવે. આ માટે સંબંધિત વિભાગોને સતત મોનીટરીંગ રાખવા અને શંકાસ્પદ પ્રવૃત્તિઓ સામે તાત્કાલિક પગલાં લેવા જણાવ્યું હતું.

બેઠકમાં ભાવ નિયંત્રણ અને પારદર્શક વિતરણ વ્યવસ્થા અંગે પણ ચર્ચા કરવામાં આવી હતી. નાગરિકોને યોગ્ય ભાવમાં અને સમયસર ચીજવસ્તુઓ ઉપલબ્ધ રહે તે માટે તમામ વિભાગો વચ્ચે સંકલન જાળવવાની જરૂરિયાત પર ભાર મૂકાયો હતો.

કલેક્ટરશ્રી અનિલ ધામેલિયાએ જણાવ્યું હતું કે નાગરિકોની સુવિધા અને હિત સરકારની પ્રથમ પ્રાથમિકતા છે અને તેના માટે તમામ અધિકારીઓએ જવાબદારીપૂર્વક કામગીરી કરવી જરૂરી છે. તેમણે જિલ્લા પ્રશાસનને સજાગ અને સતર્ક રહીને કાર્ય કરવાની અપીલ કરી હતી.

આ બેઠક વડોદરા જિલ્લામાં પુરવઠા વ્યવસ્થાને વધુ મજબૂત બનાવવામાં મહત્વપૂર્ણ સાબિત થશે અને નાગરિકોને રાહતરૂપ બનશે.