વિશ્વવિખ્યાત Statue of Unity ખાતે કેન્દ્રીય પર્યટન મંત્રી Gajendra Singh Shekhawat અને કેન્દ્રીય રાજ્ય મંત્રી Suresh Gopi એ મુલાકાત લઈને ભારતના લોહપુરુષ Sardar Vallabhbhai Patel ને પુષ્પાંજલિ અર્પણ કરી હતી. બંને નેતાઓએ સ્ટેચ્યુ ઓફ યુનિટીની વિશ્વસ્તરીય પ્રવાસન સુવિધાઓ, સ્વચ્છતા અને આધુનિક વિકાસકાર્યોની પ્રશંસા કરી હતી.

કેન્દ્રીય પર્યટન મંત્રી ગજેન્દ્રસિંહ શેખાવતે જણાવ્યું હતું કે સ્ટેચ્યુ ઓફ યુનિટી માત્ર એક પ્રવાસન સ્થળ નથી, પરંતુ દેશભક્તિ, એકતા અને રાષ્ટ્રીય ગૌરવનું પ્રતિક છે. તેમણે કહ્યું કે સરદાર પટેલે દેશની એકતા અને અખંડિતતા માટે આપેલું યોગદાન આજે પણ દરેક ભારતીય માટે પ્રેરણારૂપ છે. સ્ટેચ્યુ ઓફ યુનિટી દ્વારા વિશ્વભરમાં ભારતની સાંસ્કૃતિક શક્તિ અને વિકાસની નવી ઓળખ ઉભી થઈ રહી છે.

તેમણે વધુમાં ઉમેર્યું કે અહીં વિકસાવવામાં આવેલી આધુનિક સુવિધાઓ, હરિયાળી, પર્યાવરણમૈત્રી પ્રયાસો અને પ્રવાસન માટેની વ્યવસ્થાઓ ગુજરાતને વૈશ્વિક પર્યટન નકશા પર વધુ મજબૂત સ્થાન અપાવી રહી છે. પ્રવાસીઓ માટેની સુવિધાઓ અને ટેક્નોલોજી આધારિત વિકાસને કારણે દેશ-વિદેશમાંથી લાખો પ્રવાસીઓ અહીં આવી રહ્યા છે.

કેન્દ્રીય રાજ્ય મંત્રી સુરેશ ગોપીએ પણ સ્ટેચ્યુ ઓફ યુનિટીની મુલાકાતને યાદગાર ગણાવી હતી. તેમણે જણાવ્યું કે દરેક ભારતીયે જીવનમાં એકવાર તો સ્ટેચ્યુ ઓફ યુનિટીની મુલાકાત લેવી જ જોઈએ, કારણ કે અહીં માત્ર વિશ્વની સૌથી ઊંચી પ્રતિમા જ નહીં પરંતુ રાષ્ટ્રપ્રેમ અને એકતાની અનોખી અનુભૂતિ પણ થાય છે.

બંને નેતાઓએ યુવાનોને સરદાર પટેલના જીવનમૂલ્યો, રાષ્ટ્રસેવા, શિસ્ત અને એકતાના આદર્શોમાંથી પ્રેરણા લેવા અપીલ કરી હતી. તેમણે જણાવ્યું કે આજના સમયમાં દેશની પ્રગતિ માટે એકતા અને રાષ્ટ્રીય ભાવના સૌથી મહત્વપૂર્ણ છે.

સ્ટેચ્યુ ઓફ યુનિટી આજે ગુજરાત અને ભારતના ગૌરવનું પ્રતિક બની રહ્યું છે, જ્યાં પ્રવાસન સાથે રાષ્ટ્રભાવના અને ઇતિહાસનું અનોખું સંકલન જોવા મળે છે.