Editor2
Vyara ખાતે જિલ્લા સેવાસદન પરિસરમાં જિલ્લા ટ્રાફિક શાખા દ્વારા માર્ગ સુરક્ષા અને ટ્રાફિક નિયમોના પાલન અંગે વિશેષ ટ્રાફિક ડ્રાઇવનું આયોજન કરવામાં આવ્યું હતું. આ અભિયાન જિલ્લા ટ્રાફિક શાખાના પોલીસ ઇન્સ્પેક્ટર શ્રી એસ.બી. શેખ તથા પોલીસ સબ ઇન્સ્પેક્ટર શ્રી બી.બી. પરધનના માર્ગદર્શન હેઠળ યોજાયું હતું.
વિશેષ ડ્રાઇવ દરમિયાન જિલ્લા સેવાસદન ગેટ નજીક આવતા સરકારી કર્મચારીઓ તેમજ અન્ય વાહનચાલકોની ચકાસણી કરવામાં આવી હતી. ટ્રાફિક પોલીસે ખાસ કરીને ટુ-વ્હીલર વાહનચાલકોમાં હેલ્મેટ વગર મુસાફરી કરતા લોકો સામે કાર્યવાહી હાથ ધરી હતી. ઉપરાંત ફોર-વ્હીલર વાહનોમાં કાળા કાચ, સીટબેલ્ટ વગર ડ્રાઇવિંગ તેમજ વાહનોના જરૂરી દસ્તાવેજો જેમ કે PUC સર્ટિફિકેટ અને ઈન્સ્યોરન્સની પણ તપાસ કરવામાં આવી હતી.
ટ્રાફિક પોલીસ દ્વારા વાહનચાલકોને માર્ગ સુરક્ષાના નિયમોનું પાલન કરવા સમજ આપવામાં આવી હતી. સાથે જ રોડ સેફટી અંગે જાગૃતિ લાવવા માટે પેમ્ફલેટનું વિતરણ કરીને લોકોને સુરક્ષિત વાહન વ્યવહાર અંગે માહિતગાર કરવામાં આવ્યા હતા.
અધિકારીઓએ જણાવ્યું હતું કે આ પ્રકારના અભિયાનનો મુખ્ય હેતુ માર્ગ અકસ્માતોમાં ઘટાડો લાવવાનો અને લોકોમાં જવાબદાર તથા સુરક્ષિત ડ્રાઇવિંગની સંસ્કૃતિ વિકસાવવાનો છે. ખાસ કરીને હેલ્મેટ અને સીટબેલ્ટના ઉપયોગ અંગે લોકોમાં જાગૃતિ વધારવા પર ભાર મૂકવામાં આવ્યો હતો.
જિલ્લા ટ્રાફિક શાખા દ્વારા આગામી સમયમાં પણ આવા વિશેષ ચેકિંગ અભિયાનો ચાલુ રાખવામાં આવશે, જેથી ટ્રાફિક નિયમોના પાલનને વધુ મજબૂત બનાવી શકાય અને માર્ગ અકસ્માતોની સંખ્યામાં ઘટાડો થાય.
રોડ સેફટી માટે સરકાર અને પોલીસ તંત્ર સતત પ્રયત્નશીલ છે, ત્યારે નાગરિકો દ્વારા પણ ટ્રાફિક નિયમોનું પાલન કરવું અત્યંત જરૂરી બન્યું છે. સુરક્ષિત વાહન વ્યવહાર જ જીવન સુરક્ષાનું પ્રથમ પગલું હોવાનું અધિકારીઓએ જણાવ્યું હતું.
