સુરત જિલ્લાના ઓલપાડ તાલુકાના જીણોદ ગામે રાજ્યપાલ Acharya Devvratએ ‘ગ્રામ કલ્યાણ કાર્યક્રમ’ અંતર્ગત રાત્રિસભા યોજી ગ્રામજનો સાથે આત્મીય સંવાદ કર્યો હતો. બે દિવસીય સુરત મુલાકાતના પ્રથમ દિવસે યોજાયેલી આ સભામાં મોટી સંખ્યામાં ગામલોકો ઉપસ્થિત રહ્યા હતા.

રાજ્યપાલશ્રીએ પોતાના સંબોધનમાં સ્વચ્છતા, વૃક્ષારોપણ, વ્યસનમુક્ત સમાજ, ગુણવત્તાયુક્ત શિક્ષણ અને પ્રાકૃતિક ખેતી જેવા મુદ્દાઓ પર વિશેષ ભાર મુક્યો હતો. તેમણે જણાવ્યું કે, “ગામના દરેક વ્યક્તિએ દર વર્ષે ઓછામાં ઓછું એક વૃક્ષ રોપવાનો સંકલ્પ લેવો જોઈએ અને તેનું જતન કરવું જોઈએ.” સાથે જ જન્મદિવસ અને લગ્નની વર્ષગાંઠ જેવા પ્રસંગોએ વૃક્ષારોપણ કરવાની પ્રેરણા આપી.

રાજ્યપાલશ્રીએ ગામની એકતા અને સમરસતાની પ્રશંસા કરતાં જણાવ્યું કે, પરિવાર અને સમાજમાં સ્નેહ અને ભાઈચારો હોય તો તે ધરતી પર સ્વર્ગ સમાન છે. તેમણે ગ્રામજનોને અઠવાડિયામાં એક દિવસ ગામની સફાઈ માટે ફાળવવા અને પર્યાવરણની જાળવણીમાં સક્રિય ભાગ લેવા અનુરોધ કર્યો.

પર્યાવરણ સંરક્ષણ અંગે તેમણે Narendra Modi દ્વારા પ્રેરિત ‘એક પેડ માં કે નામ’ અભિયાનનો ઉલ્લેખ કરી વધુમાં વધુ વૃક્ષારોપણ અને તેનું સંવર્ધન કરવાની જરૂરિયાત દર્શાવી. વૃક્ષો 24 કલાક ઓક્સિજન આપે છે, તેથી ભવિષ્યમાં ઓક્સિજનની અછત ટાળવા માટે વૃક્ષોનું મહત્વ સમજાવ્યું.

સ્વાસ્થ્ય અંગે વાત કરતાં રાજ્યપાલશ્રીએ સાત્વિક આહાર અપનાવવા અને જંક ફૂડથી દૂર રહેવા સલાહ આપી. તેમણે તમાકુ, દારૂ અને ગુટકા જેવા વ્યસનોને ગંભીર આરોગ્ય જોખમ ગણાવી જણાવ્યું કે આવા વ્યસનો કેન્સર જેવી જીવલેણ બીમારીઓનું કારણ બને છે, જેનાથી પરિવાર અને આર્થિક સ્થિતિ બંને પર પ્રતિકૂળ અસર પડે છે.

બાળકોના સંસ્કાર પર ભાર મુકતા તેમણે કહ્યું કે સંસ્કારી અને વ્યસનમુક્ત પેઢી જ દેશના ભવિષ્યને સુરક્ષિત બનાવી શકે છે. આ રીતે જીણોદ ગામમાં યોજાયેલી રાત્રિસભા પ્રેરણાદાયક અને જનજાગૃતિ લાવતી સાબિત થઈ હતી.