ગાંધીનગર જિલ્લામાં લોકશાહીના પર્વને વધુ સશક્ત બનાવવા માટે મતદાર જાગૃતિનો ભવ્ય શંખનાદ કરવામાં આવ્યો છે. સ્થાનિક સ્વરાજ્યની આગામી સામાન્ય અને પેટા ચૂંટણીઓમાં વધુમાં વધુ જનભાગીદારી સુનિશ્ચિત થાય તે માટે જિલ્લા વહીવટી તંત્ર દ્વારા વિશેષ અભિયાન શરૂ કરવામાં આવ્યું છે.

જિલ્લા શિક્ષણાધિકારી કચેરીના માર્ગદર્શન હેઠળ 13 એપ્રિલ 2026થી SVAP (State Voters Awareness Programme) નો જિલ્લાભરમાં ભવ્ય પ્રારંભ થયો છે. આ અભિયાન અંતર્ગત જિલ્લાના અંદાજે 1000 જેટલી સરકારી, ગ્રાન્ટેડ અને ખાનગી શાળાઓમાં વિશેષ કાર્યક્રમો યોજાયા હતા.

અભિયાનના પ્રથમ દિવસે જ સવારની પ્રાર્થના સભાઓમાં લોકશાહીના મૂલ્યો ગુંજી ઉઠ્યા હતા. આ પ્રસંગે આશરે 80,000થી વધુ વિદ્યાર્થીઓ, શિક્ષકો અને શાળા સ્ટાફે સામૂહિક રીતે મતદાન જાગૃતિનો શપથ લીધો હતો. વિદ્યાર્થીઓએ નિર્ભય, નિષ્પક્ષ અને પ્રલોભન મુક્ત મતદાન કરવાની સાથે અન્ય લોકોને પણ મતદાન માટે પ્રેરિત કરવાનો સંકલ્પ વ્યક્ત કર્યો હતો.

શાળાઓમાં કાર્યરત ઇલેક્ટોરલ લિટરસી ક્લબ (ELC)ના નોડલ શિક્ષકો દ્વારા વિદ્યાર્થીઓને લોકશાહીના મૂળભૂત સિદ્ધાંતો અને એક મતના મહત્વ વિશે વિગતવાર માર્ગદર્શન આપવામાં આવ્યું હતું. આ અભિયાનનો મુખ્ય હેતુ વિદ્યાર્થીઓ મારફતે તેમના પરિવારજનો અને સમાજના અન્ય લોકો સુધી મતદાન અંગે જાગૃતિ ફેલાવવાનો છે.

અભિયાનને મળેલા ઉત્સાહજનક પ્રતિસાદને ધ્યાનમાં રાખીને આગામી દિવસોમાં વિવિધ સર્જનાત્મક પ્રવૃત્તિઓનું આયોજન કરવામાં આવશે. તેમાં નિબંધ સ્પર્ધા, વક્તૃત્વ સ્પર્ધા અને ચિત્રકલા જેવી પ્રવૃત્તિઓ દ્વારા મતદાર જાગૃતિને વધુ પ્રબળ બનાવવામાં આવશે.

જિલ્લા તંત્રનો વિશ્વાસ છે કે આ પ્રકારના પ્રયાસો દ્વારા મતદાન પ્રત્યે લોકોમાં જાગૃતિ વધશે અને આવનારી ચૂંટણીમાં વધુ પ્રમાણમાં મતદાન નોંધાશે. ગાંધીનગર જિલ્લામાં શરૂ થયેલ આ પહેલ લોકશાહી મજબૂત બનાવવા માટે એક મહત્વપૂર્ણ પગલું સાબિત થશે.