બનાસકાંઠા જિલ્લામાં ૩૧ માર્ચે વડાપ્રધાન Narendra Modiના પ્રસ્તાવિત કાર્યક્રમને ધ્યાનમાં રાખીને વાવ-થરાદ વિસ્તારના લાખણી તાલુકાના નાણી ગામે તૈયારીઓ તેજ ગતિએ ચાલી રહી છે. જિલ્લા વહીવટી તંત્ર દ્વારા તમામ વ્યવસ્થાઓને અંતિમ ઓપ આપવામાં આવી રહ્યો છે, જેથી કાર્યક્રમ સુચારૂ રીતે પૂર્ણ થઈ શકે.

આ કાર્યક્રમ પૂર્વે રાજ્ય સરકારના કેબિનેટ મંત્રી Rushikesh Patel, મંત્રી Pravin Mali અને મંત્રી Swarupji Thakorએ નાણી ખાતે સ્થળ મુલાકાત લીધી હતી. મંત્રીઓએ અધિકારીશ્રીઓ સાથે બેઠક યોજી અને કાર્યક્રમની તૈયારીઓ અંગે વિસ્તૃત ચર્ચા કરી હતી.

મુલાકાત દરમિયાન મંત્રીઓએ સ્ટેજ વ્યવસ્થા, સુરક્ષા, ટ્રાફિક નિયંત્રણ, પીવાના પાણી, આરોગ્ય સેવાઓ અને જનસુવિધાઓ જેવી તમામ જરૂરી બાબતોની સમીક્ષા કરી હતી. તેમણે અધિકારીઓને સૂચના આપી કે કોઈ પણ પ્રકારની ખામી ન રહે અને પ્રધાનમંત્રીના કાર્યક્રમ દરમિયાન લોકો માટે સુવિધા અને સુરક્ષા બંનેનું વિશેષ ધ્યાન રાખવામાં આવે.

વાવ-થરાદ અને Banaskantha જિલ્લાના વહીવટી તંત્રે પણ આ કાર્યક્રમને સફળ બનાવવા માટે સંપૂર્ણ તૈયારી દર્શાવી છે. પોલીસ, આરોગ્ય વિભાગ, નગરપાલિકા અને અન્ય તમામ વિભાગો વચ્ચે સુમેળ સાધીને કાર્ય કરવામાં આવી રહ્યું છે.

નાણી ગામમાં વડાપ્રધાનના આગમનને લઈને સ્થાનિક લોકોમાં ઉત્સાહનો માહોલ જોવા મળી રહ્યો છે. મોટા પ્રમાણમાં લોકો કાર્યક્રમમાં હાજરી આપશે તેવી શક્યતા છે, જેને ધ્યાનમાં રાખીને વિશાળ સ્તરે આયોજન કરવામાં આવી રહ્યું છે.

આ કાર્યક્રમ માત્ર રાજકીય નહીં પરંતુ વિકાસલક્ષી દૃષ્ટિકોણથી પણ મહત્વપૂર્ણ માનવામાં આવી રહ્યો છે. રાજ્ય અને કેન્દ્ર સરકારની સંયુક્ત પહેલોથી બનાસકાંઠા જિલ્લામાં વિકાસના નવા અધ્યાય લખાશે તેવી અપેક્ષા વ્યક્ત કરવામાં આવી રહી છે.