નવા ભારતના નિર્માણમાં ખેતી ક્ષેત્રને આધુનિક બનાવવામાં ટેકનોલોજીનો મહત્વપૂર્ણ ફાળો છે તેમ ગુજરાત રાજ્યના કૃષિ મંત્રી શ્રી જીતુભાઈ વાઘાણીએ જણાવ્યું હતું. તેઓ સરદાર પટેલ યુનિવર્સિટી ખાતે “એગ્રીકલ્ચરલ ક્લિનિક એન્ડ એગ્રીકલ્ચરલ બિઝનેસ સ્કીમ” અંતર્ગત તાલીમ કેન્દ્રના ઉદ્ઘાટન કાર્યક્રમમાં ઉપસ્થિત રહ્યા હતા. આ પ્રસંગે તેમણે તાલીમ કેન્દ્રનું ઉદ્ઘાટન કરી ઉપસ્થિત વિદ્યાર્થીઓ અને યુવાનોને માર્ગદર્શન આપ્યું હતું.

કૃષિ મંત્રીએ પોતાના ઉદ્બોધનમાં જણાવ્યું કે આજના સમયમાં ખેતી માત્ર પરંપરાગત વ્યવસાય નથી, પરંતુ ટેકનોલોજી આધારિત ઉદ્યોગ બની રહી છે. સ્માર્ટ ફાર્મિંગ, ડ્રોન ટેકનોલોજી, માટી પરીક્ષણ, ડિજિટલ માર્કેટિંગ અને કૃષિ વ્યવસાય સાથે સંકળાયેલા નવીન વિચારો દ્વારા ખેડૂતોની આવકમાં વધારો શક્ય છે. ખેતી અને ટેકનોલોજીનો સંકલન નવા ભારતની પ્રગતિ માટે અનિવાર્ય છે.

“એગ્રીકલ્ચરલ ક્લિનિક એન્ડ એગ્રીકલ્ચરલ બિઝનેસ સ્કીમ” અંતર્ગત શરૂ કરાયેલું આ તાલીમ કેન્દ્ર કૃષિ સ્નાતકો અને યુવા ઉદ્યોગસાહસિકો માટે મહત્વપૂર્ણ સાબિત થશે. આ કેન્દ્ર દ્વારા ખેડૂતોને આધુનિક ખેતી પદ્ધતિઓ, પાક સંરક્ષણ, માટી અને પાણી વ્યવસ્થાપન તેમજ કૃષિ આધારિત વ્યવસાય અંગે વ્યાવસાયિક માર્ગદર્શન આપવામાં આવશે. તાલીમ પૂર્ણ કર્યા બાદ યુવાનો પોતાનો કૃષિ વ્યવસાય શરૂ કરી સ્વરોજગારની નવી તકો સર્જી શકશે.

શ્રી વાઘાણીએ વધુમાં જણાવ્યું કે રાજ્ય સરકાર ખેડૂતોના સશક્તિકરણ અને કૃષિ ક્ષેત્રના વિકાસ માટે સતત કાર્યરત છે. આવા તાલીમ કેન્દ્રો દ્વારા ગામડાંમાં રોજગારની તકો વધશે અને કૃષિ ક્ષેત્રમાં નવીનતા આવશે. સરદાર પટેલ યુનિવર્સિટી દ્વારા લેવામાં આવેલી આ પહેલ પ્રશંસનીય છે અને તે કૃષિ ક્ષેત્રને નવી દિશા આપશે.

આ કાર્યક્રમમાં યુનિવર્સિટીના કુલપતિ, પ્રાધ્યાપકો, કૃષિ નિષ્ણાતો, વિદ્યાર્થીઓ અને મોટી સંખ્યામાં ખેડૂતો ઉપસ્થિત રહ્યા હતા. તાલીમ કેન્દ્રના ઉદ્ઘાટનથી કૃષિ શિક્ષણ અને વ્યવસાયિક વિકાસ માટે એક મજબૂત પાયો તૈયાર થયો છે.