સુરત જિલ્લાના અંબિકા તાલુકાના વસરાઈ ખાતે આયોજિત રાષ્ટ્રીય આદિવાસી ઉદ્યોગ મેળો–2024 શિક્ષણ, સંસ્કૃતિ અને સ્વરોજગારના સુમેળનું ઉત્તમ ઉદાહરણ બની રહ્યો છે. મુખ્યમંત્રી ભુપેન્દ્રભાઈ પટેલ દ્વારા શરૂ કરાયેલા ચાર દિવસીય આ મેળામાં માત્ર આદિવાસી ઉત્પાદનોનું પ્રદર્શન અને વેચાણ જ નહીં, પરંતુ નવી શિક્ષણ નીતિ હેઠળ અનુભવાધારિત શિક્ષણ કેવી રીતે આત્મનિર્ભરતાનો માર્ગ બતાવે છે તે પણ સ્પષ્ટ જોવા મળે છે.

આ મેળામાં ખાસ આકર્ષણનું કેન્દ્ર બન્યું છે નવસારી જિલ્લાના મિયાનઝરી પ્રાથમિક શાળાના વિદ્યાર્થીઓ અને શિક્ષકો દ્વારા તૈયાર કરાયેલ વોરલી ચિત્રકલા સ્ટોલ. વિદ્યાર્થીઓએ બનાવેલા વોરલી પેઇન્ટિંગ્સનું મેળામાં વેચાણ થઈ રહ્યું છે, જેને રાષ્ટ્રીય સ્તરે વિશેષ પ્રશંસા મળી રહી છે. આ કળા માત્ર આદિવાસી સંસ્કૃતિનું પ્રતિબિંબ નથી, પરંતુ ભવિષ્યમાં સ્વરોજગાર માટેનો મજબૂત આધાર પણ બની રહી છે.

મિયાનઝરી પ્રાથમિક શાળા છેલ્લા ત્રણ વર્ષથી નવી શિક્ષણ નીતિ (NEP) અંતર્ગત અનુભવાધારિત અને વ્યવસાયલક્ષી શિક્ષણનું જીવંત ઉદાહરણ બની છે. શાળામાં દર શનિવારે ‘બેગલેસ ડે’ ઉજવવામાં આવે છે, જેમાં બાળકોને કલા, હસ્તકલા, સ્થાનિક સંસ્કૃતિ અને વ્યવસાયિક કૌશલ્ય સાથે જોડતી વિવિધ પ્રવૃત્તિઓ કરાવવામાં આવે છે. શિક્ષકો સતત માર્ગદર્શન આપી વિદ્યાર્થીઓને અભ્યાસ સાથે વ્યવસાયિક અનુભવ આપવાનું કાર્ય કરી રહ્યા છે.

બાળકોના હાથમાં બ્રશ, મનમાં આત્મવિશ્વાસ અને ભવિષ્યમાં સ્વરોજગારની દિશા—આ દ્રશ્ય આજની આધુનિક શિક્ષણ પદ્ધતિનો સાચો અર્થ સમજાવે છે. વોરલી કળા દ્વારા વિદ્યાર્થીઓ સર્જનાત્મકતા, સંસ્કૃતિ પ્રત્યે ગૌરવ અને વ્યવસાયિક સમજ વિકસાવી રહ્યા છે.

વસરાઈ ખાતે યોજાયેલા આ મેળામાં પરંપરાગત હસ્તકલા, આદિવાસી આભૂષણો, વનઉત્પાદનો, ખાદ્ય પદાર્થો તેમજ સ્થાનિક પીણાંના સ્ટોલ પણ લોકો માટે વિશેષ આકર્ષણનું કેન્દ્ર બન્યા છે. રાષ્ટ્રીય આદિવાસી ઉદ્યોગ મેળો–2024 સાબિત કરે છે કે શિક્ષણ અને સંસ્કૃતિ સાથે જોડાયેલ સ્વરોજગાર આદિવાસી સમાજને આત્મનિર્ભર બનાવવાની દિશામાં મહત્વપૂર્ણ પગલું છે.