મહેસાણા જિલ્લાના લખવાડ ગામ ખાતે લખવાડ નાગરિક સહકારી બેંક લિમિટેડની સુવર્ણ જયંતિ સમારંભનું ભવ્ય આયોજન કરવામાં આવ્યું હતું. સહકારી ક્ષેત્રમાં વિશ્વસનીય અને નિષ્ઠાપૂર્વક 60 વર્ષથી સેવા આપતી બેંકને અભિનંદન પાઠવતા મંત્રીશ્રીએ સહકારી બેંકોને ગ્રામ વિકાસની મજબૂત કડી ગણાવી હતી અને “ગામનું પૈસું ગામમાં જ રહે” તેવી વિચારધારાને આગળ ધપાવતી સંસ્થાઓ તરીકે તેની મહત્વપૂર્ણ ભૂમિકા ઉપર પ્રકાશ પાડ્યો હતો.

આ પ્રસંગે મંત્રીશ્રીએ જણાવ્યું હતું કે સહકારી બેંકો ગ્રામ્ય અર્થતંત્રની રીઢ સમાન છે. ખેડૂતો, નાના વેપારીઓ, સ્વરોજગાર અપનાવનારા યુવાનો અને ગ્રામ્ય મહિલાઓને સરળ અને વિશ્વસનીય નાણાકીય સેવાઓ પૂરી પાડી સહકારી બેંકો ગામડાના સર્વાંગી વિકાસમાં મહત્વપૂર્ણ યોગદાન આપી રહી છે. લખવાડ નાગરિક સહકારી બેંકે છેલ્લા છ દાયકામાં પારદર્શિતા, વિશ્વાસ અને સેવાના મૂલ્યોને જાળવી રાખીને સહકારી ચળવળને મજબૂત બનાવી છે.

મંત્રીશ્રીએ વધુમાં ઉમેર્યું કે સહકારી બેંકિંગ મોડલ દ્વારા સ્થાનિક બચત અને રોકાણ ગામના વિકાસ માટે ઉપયોગમાં લેવાય છે, જેના પરિણામે રોજગાર સર્જન, વ્યવસાયિક પ્રવૃત્તિઓ અને આર્થિક સ્થિરતા વધે છે. “ગામનું નાણું ગામમાં જ વપરાય” તે સંકલ્પના ગ્રામ્ય સ્વાવલંબન અને આત્મનિર્ભરતાની દિશામાં મહત્વપૂર્ણ પગલું છે, જે સહકારી બેંકો સફળતાપૂર્વક અમલમાં મૂકી રહી છે.

સુવર્ણ જયંતિ સમારંભ દરમિયાન બેંકના સ્થાપક સભ્યો, ભૂતપૂર્વ પદાધિકારીઓ અને કર્મચારીઓના યોગદાનને પણ સન્માનપૂર્વક યાદ કરવામાં આવ્યું હતું. બેંકના વિકાસયાત્રા અંગેની ઝલક રજૂ કરી સહકારી મૂલ્યોને જનમાનસ સુધી પહોંચાડવાનો પ્રયાસ કરવામાં આવ્યો હતો.

લખવાડ નાગરિક સહકારી બેંક લિમિટેડ આજે માત્ર નાણાકીય સંસ્થા નહીં પરંતુ ગ્રામ વિકાસ, સામાજિક જવાબદારી અને વિશ્વાસનું પ્રતિક બની છે. 60 વર્ષની સફળ યાત્રા પૂર્ણ કરનાર આ બેંક આવનારા સમયમાં પણ સહકારી ક્ષેત્રમાં નવી ઊંચાઈઓ હાંસલ કરશે તેવી આશા વ્યક્ત કરવામાં આવી હતી.