ગુજરાતની રાજધાની ગાંધીનગરમાં ગુજરાત રાજ્ય વહીવટી સચિવાલય વેલફેર કમિટીના આયોજન હેઠળ અખિલ ભારતીય મુલકી સેવા લોન ટેનિસ ટૂર્નામેન્ટ 2025-26નો ભવ્ય શુભારંભ કરવામાં આવ્યો. આ સ્પર્ધાનો ઉદ્ઘાટન કાર્યક્રમ રાજ્યના મુખ્ય સચિવ શ્રી એમ. કે. દાસના કરકમળે યોજાયો હતો. આ ટૂર્નામેન્ટ સેક્ટર-21 સ્થિત જિમખાના મેદાન ખાતે યોજાશે અને તારીખ 16 ડિસેમ્બરથી 22 ડિસેમ્બર દરમિયાન રમાશે.

આ રાષ્ટ્રીય સ્તરની રમતોત્સવમાં દેશભરમાંથી આવેલા કુલ 28 ટીમોના 266 ખેલાડીઓ ભાગ લઈ રહ્યા છે. વિવિધ રાજ્યો અને કેન્દ્રશાસિત પ્રદેશોના વહીવટી અધિકારીઓ અને કર્મચારીઓ વચ્ચે યોજાતી આ સ્પર્ધા રમતગમત સાથે સાથે એકતા, શિસ્ત અને સ્વસ્થ સ્પર્ધાત્મક ભાવનાનું ઉત્તમ ઉદાહરણ પૂરું પાડે છે.

ઉદ્ઘાટન પ્રસંગે મુખ્ય સચિવ શ્રી એમ. કે. દાસે પોતાના સંબોધનમાં જણાવ્યું હતું કે રમતગમત માત્ર શારીરિક તંદુરસ્તી માટે જ નહીં પરંતુ માનસિક સક્ષમતા, શિસ્ત અને નેતૃત્વ ગુણોના વિકાસ માટે પણ અત્યંત મહત્વપૂર્ણ છે. તેમણે ઉમેર્યું કે ઓલિમ્પિક્સ, એશિયન ગેમ્સ અને કોમનવેલ્થ ગેમ્સ જેવી આંતરરાષ્ટ્રીય સ્પર્ધાઓમાં ભારતીય ખેલાડીઓ દ્વારા મેળવવામાં આવતા પદકો ભારતના આત્મવિશ્વાસ, પ્રતિબદ્ધતા અને વૈશ્વિક પ્રતિષ્ઠાના પ્રતીક છે.

શ્રી દાસે વધુમાં જણાવ્યું કે વહીવટી સેવાઓ સાથે સંકળાયેલા અધિકારીઓ માટે રમતગમત જીવનમાં સંતુલન જાળવવા અને ટીમ ભાવનાને મજબૂત બનાવવા માટે ઉપયોગી છે. આવા ટૂર્નામેન્ટ્સ દ્વારા વિવિધ રાજ્યોના અધિકારીઓ વચ્ચે પરસ્પર સંવાદ અને સહયોગ વધે છે, જે અંતે દેશના પ્રશાસનને વધુ મજબૂત બનાવે છે.

આ ટૂર્નામેન્ટ દરમિયાન પુરુષ અને મહિલા વર્ગની વિવિધ મેચો રમાશે. દર્શકો અને રમતપ્રેમીઓ માટે આ સ્પર્ધા આકર્ષણનું કેન્દ્ર બની છે. અખિલ ભારતીય મુલકી સેવા લોન ટેનિસ ટૂર્નામેન્ટ 2025-26 ગાંધીનગર માટે ગૌરવરૂપ બન્યું છે અને રાજ્યમાં રમતગમત સંસ્કૃતિને વધુ પ્રોત્સાહન આપશે.