Editor2
સ્થાનિક સ્વરાજ્ય સામાન્ય ચૂંટણી-૨૦૨૬ને ધ્યાનમાં રાખીને જિલ્લા ચૂંટણી અધિકારી શ્રી પ્રવીણ ચૌધરી દ્વારા ચૂંટણીલક્ષી કામગીરી અને પ્રક્રિયા અંગે વિસ્તૃત માહિતી આપવામાં આવી હતી. જિલ્લામાં ચૂંટણી પ્રક્રિયા સંપૂર્ણ ન્યાયપૂર્ણ, પારદર્શક અને સુચારૂ રીતે પૂર્ણ થાય તે માટે જિલ્લા ચૂંટણીતંત્ર દ્વારા તમામ તૈયારીઓ પૂર્ણ કરી દેવામાં આવી છે.
શ્રી ચૌધરીએ જણાવ્યું હતું કે ચૂંટણી દરમિયાન મતદારોને કોઈપણ પ્રકારની મુશ્કેલી ન પડે તે માટે તમામ મતદાન કેન્દ્રો પર જરૂરી સુવિધાઓ ઉપલબ્ધ કરાવવામાં આવશે. ખાસ કરીને પીવાનું શુદ્ધ પાણી, બેસવા માટે ખુરશીઓ, તથા ગરમીથી બચવા માટે છાંયડો રહે તે માટે શેડની વ્યવસ્થા કરવામાં આવી રહી છે. વૃદ્ધો, દિવ્યાંગજનો અને ગર્ભવતી મહિલાઓ માટે પણ ખાસ સુવિધાઓ ગોઠવવામાં આવી રહી છે જેથી તેઓ સરળતાથી મતદાન કરી શકે.
તેમણે વધુમાં જણાવ્યું હતું કે જિલ્લા તંત્ર દ્વારા તમામ પોલિંગ સ્ટાફને તાલીમ આપવામાં આવી છે અને મતદાન પ્રક્રિયા દરમિયાન કોઈ વિઘ્ન ન આવે તે માટે દરેક સ્તરે કડક દેખરેખ રાખવામાં આવશે. આ ઉપરાંત કાયદો અને વ્યવસ્થા જાળવવા માટે પોલીસ તંત્ર પણ સંપૂર્ણ રીતે તૈયાર છે અને સંવેદનશીલ વિસ્તારોમાં વધારાનો બંદોબસ્ત ગોઠવવામાં આવશે.
મતદારોને પોતાના મતાધિકારનો ઉપયોગ કરવા અનુરોધ કરતાં જિલ્લા ચૂંટણી અધિકારીએ જણાવ્યું હતું કે તા. ૨૬ એપ્રિલના રોજ સવારે ૦૭:૦૦ વાગ્યાથી સાંજે ૦૬:૦૦ વાગ્યા સુધી મતદાન યોજાશે. તમામ મતદારો સમયસર મતદાન કેન્દ્ર પર પહોંચી પોતાના મતનો હક નિભાવશે તેવી આશા વ્યક્ત કરવામાં આવી છે.
આ ચૂંટણી પ્રક્રિયા નિષ્પક્ષ અને શાંતિપૂર્ણ રીતે પૂર્ણ થાય તે માટે જિલ્લા તંત્ર સતત મોનીટરીંગ કરી રહ્યું છે. ચૂંટણી સંબંધિત કોઈપણ માહિતી કે મદદ માટે કંટ્રોલ રૂમ પણ કાર્યરત રાખવામાં આવ્યો છે.
જિલ્લા તંત્ર દ્વારા કરવામાં આવેલી આ સઘન તૈયારીઓના કારણે મતદારોને સરળ અને સુરક્ષિત માહોલમાં મતદાન કરવાની સુવિધા મળશે, જે લોકશાહી પ્રત્યેનો વિશ્વાસ વધુ મજબૂત બનાવશે.
