આગામી ચોમાસાની ઋતુને ધ્યાનમાં રાખીને ભરૂચ જિલ્લામાં પ્રિ-મોન્સુન તૈયારીઓ વધુ મજબૂત બનાવવામાં આવી રહી છે. સંભવિત પૂર, અતિવૃષ્ટિ અને કુદરતી પરિસ્થિતિઓ સામે અસરકારક રીતે કામગીરી થઈ શકે તે માટે જિલ્લા આયોજન કચેરીના સભાખંડમાં જિલ્લા કલેક્ટર શ્રી ગૌરાંગ મકવાણાના અધ્યક્ષસ્થાને મહત્વપૂર્ણ સમીક્ષા બેઠક યોજાઈ હતી. બેઠક દરમિયાન વિવિધ વિભાગોની તૈયારીઓની વિગતવાર સમીક્ષા કરવામાં આવી હતી.

કલેક્ટરશ્રીએ બેઠકમાં ઉપસ્થિત તમામ વિભાગોના અધિકારીઓને પોતાની જવાબદારીઓ સમયસર અને સુવ્યવસ્થિત રીતે નિભાવવાની સૂચના આપી હતી. તેમણે ખાસ કરીને વરસાદી માહોલ દરમિયાન નાગરિકોને કોઈપણ પ્રકારની મુશ્કેલી ન પડે તે માટે આગોતરા આયોજન પર ભાર મૂક્યો હતો. વરસાદી પરિસ્થિતિમાં રસ્તાઓ, વીજ પુરવઠો, આરોગ્ય સેવાઓ, પાણી નિકાલ વ્યવસ્થા અને રાહત કામગીરીને વધુ સક્રિય રાખવા સંબંધિત વિભાગોને જરૂરી માર્ગદર્શન આપવામાં આવ્યું હતું.

બેઠક દરમિયાન જિલ્લા તંત્ર દ્વારા પૂરપ્રવણ વિસ્તારોની ઓળખ, નદી કિનારાના ગામોમાં સતર્કતા, ડ્રેનેજ વ્યવસ્થાની સફાઈ અને ઇમરજન્સી સેવાઓની તૈયારી અંગે ચર્ચા કરવામાં આવી હતી. કલેક્ટરશ્રીએ જણાવ્યું હતું કે ચોમાસા દરમિયાન કોઈપણ આપત્તિજનક સ્થિતિ સર્જાય તો તંત્ર તાત્કાલિક અસરથી કામગીરી કરી શકે તે માટે તમામ વિભાગો વચ્ચે સંકલન જરૂરી છે.

આ ઉપરાંત આરોગ્ય વિભાગને દવાઓ અને મેડિકલ ટીમોની તૈયારીઓ સુનિશ્ચિત કરવા, વીજ વિભાગને વીજ પુરવઠો અવિરત રાખવા અને માર્ગ-મકાન વિભાગને વરસાદી પાણીના નિકાલ માટે યોગ્ય વ્યવસ્થા જાળવવા સૂચના આપવામાં આવી હતી. નગરપાલિકા અને ગ્રામ પંચાયત તંત્રને સફાઈ અભિયાન અને ગટર વ્યવસ્થાની ચકાસણી માટે સક્રિય બનવા જણાવાયું હતું.

જિલ્લા કલેક્ટર શ્રી ગૌરાંગ મકવાણાએ તમામ અધિકારીઓને ટીમ વર્ક સાથે કામગીરી કરવાની અપીલ કરી હતી અને જણાવ્યું હતું કે નાગરિકોની સુરક્ષા અને સુખાકારી તંત્રની પ્રથમ પ્રાથમિકતા છે. ભરૂચ જિલ્લામાં ચોમાસા દરમિયાન કોઈપણ પરિસ્થિતિનો સામનો કરવા માટે તંત્ર સંપૂર્ણ રીતે સજ્જ હોવાનું પણ બેઠકમાં જણાવાયું હતું।