ગુજરાતના ઉપ મુખ્યમંત્રી શ્રી હર્ષભાઈ સંઘવી વર્લ્ડ ઇકોનોમિક ફોરમ–2026માં ભાગ લેવા માટે સ્વિટ્ઝર્લેન્ડના દાવોસ માટે રવાના થયા છે. અમદાવાદ આંતરરાષ્ટ્રીય વિમાનમથક પર ઉપ મુખ્યમંત્રી અને તેમની સાથે ગયેલી ઉચ્ચ સ્તરીય પ્રતિનિધિ મંડળને ભવ્ય વિદાય અને સન્માન આપવામાં આવ્યું હતું. આ પ્રસંગે રાજ્ય સરકારના વરિષ્ઠ અધિકારીઓ, ઉદ્યોગ જગતના પ્રતિનિધિઓ તથા સમર્થકો હાજર રહ્યા હતા.

વર્લ્ડ ઇકોનોમિક ફોરમ–2026ના વૈશ્વિક મંચ પર ‘ટીમ ગુજરાત’ વિકસિત ગુજરાતની દ્રષ્ટિ, ઔદ્યોગિક વારસો અને ભવિષ્યની વિકાસયોજનાઓ રજૂ કરશે. ઉપ મુખ્યમંત્રી શ્રી હર્ષભાઈ સંઘવીએ જણાવ્યું હતું કે, ગુજરાત આજે ભારતનું આગવું ઔદ્યોગિક રાજ્ય છે અને રાજ્યની મજબૂત નીતિઓ, ઈન્ફ્રાસ્ટ્રક્ચર, સરળ વ્યવસાય વાતાવરણ તથા નવીન ટેકનોલોજી આધારિત વિકાસ મોડલને વૈશ્વિક રોકાણકારો સમક્ષ રજૂ કરવામાં આવશે.

આ ઉચ્ચ સ્તરીય પ્રતિનિધિ મંડળનું નેતૃત્વ ઉપ મુખ્યમંત્રી જાતે કરશે અને ગુજરાતને વૈશ્વિક મેન્યુફેક્ચરિંગ હબ તરીકે રજૂ કરવાનો મુખ્ય હેતુ રહેશે. ફોરમ દરમિયાન આંતરરાષ્ટ્રીય ઉદ્યોગપતિઓ, રોકાણકારો અને નીતિનિર્માતાઓ સાથે બેઠક યોજાઈ ગુજરાતમાં રોકાણની નવી તકો અંગે ચર્ચા કરવામાં આવશે. ખાસ કરીને મેન્યુફેક્ચરિંગ, ગ્રીન એનર્જી, સ્ટાર્ટઅપ્સ, ડિજિટલ ઇન્ફ્રાસ્ટ્રક્ચર અને સસ્ટેનેબલ ડેવલપમેન્ટ જેવા ક્ષેત્રોમાં ગુજરાતની ક્ષમતાઓ રજૂ કરવામાં આવશે.

ઉપ મુખ્યમંત્રીએ ઉમેર્યું હતું કે, “વર્લ્ડ ઇકોનોમિક ફોરમ ગુજરાત માટે વૈશ્વિક સ્તરે પોતાની શક્તિ દર્શાવવાનો મહત્વપૂર્ણ અવસર છે. ‘વિકસિત ગુજરાત’ના રોડમેપ સાથે અમે વૈશ્વિક ભાગીદારી મજબૂત કરીશું અને રાજ્યમાં વધુ રોજગાર સર્જન તથા ઔદ્યોગિક વિકાસને વેગ આપશું.”

દાવોસ ખાતે યોજાનાર આ વૈશ્વિક સંમેલનમાં ‘ટીમ ગુજરાત’ની સક્રિય ભાગીદારીથી ગુજરાતની આંતરરાષ્ટ્રીય ઓળખ વધુ મજબૂત બનશે અને રાજ્યને વૈશ્વિક રોકાણ માટે આકર્ષક ગંતવ્ય તરીકે નવી ઊંચાઈ મળશે.