Editor2
રાજ્યના મુખ્યમંત્રી શ્રી ભૂપેન્દ્ર પટેલે જણાવ્યું હતું કે વર્ષ ૨૦૨૧ના પ્રથમ માસમાં રાજ્યભરમાં ૧૦ કરોડ રૂપિયાથી વધુના વિકાસ કાર્યો જનતાને સમર્પિત કરવામાં આવ્યા છે. સુરત શહેર ખાતે આયોજિત કાર્યક્રમ દરમિયાન તેમણે સુરત મહાનગરપાલિકાના રૂ. ૩.૪ કરોડના વિકાસ કાર્યો તેમજ સુરત શહેરના નાગરિકો માટે રૂ. ૬ કરોડના વિકાસ પ્રોજેક્ટ્સનું લોકાર્પણ અને ખાતમુહૂર્ત કર્યું હતું.
આ પ્રસંગે મુખ્યમંત્રીએ સ્પષ્ટ શબ્દોમાં જણાવ્યું હતું કે, પ્રધાનમંત્રી શ્રી નરેન્દ્રભાઈ મોદીએ વિકસાવેલી સમયબદ્ધ આયોજન અને કાર્યસંસ્કૃતિને આજની સરકાર સફળતાપૂર્વક આગળ વધારી રહી છે. તેમણે ઉમેર્યું કે એક જ સરકારના કાર્યકાળ દરમિયાન યોજનાઓનું આયોજન, અમલ અને પૂર્ણતા થાય તે ગુજરાત સરકારની વિશેષ ઓળખ બની છે.
ડાભોલી સ્થિત અટલ બિહારી વાજપેયી ઓડિટોરિયમ ખાતે આયોજિત સમારંભમાં મુખ્યમંત્રીએ જણાવ્યું હતું કે આજે સુરત શહેર દેશભરમાં વિકાસ, સ્વચ્છતા અને આધુનિક શહેરીકરણનું ઉત્તમ મોડેલ બની ચૂક્યું છે. સુરતની સ્વચ્છતા નાગરિકોની જાગૃતિ અને સ્વચ્છતા પ્રત્યેના પ્રેમનું પરિણામ છે. આજે સુરત સ્વચ્છતા, શિસ્ત અને આધુનિક અર્બન પ્લાનિંગમાં મુંબઈ જેવા મહાનગરોને પણ પાછળ મૂકી રહ્યું છે.
રાજ્યના ગૃહ અને શહેરી વિકાસ વિભાગના જવાબદાર તથા નાયબ મુખ્યમંત્રી શ્રી હર્ષ સંઘવીએ જણાવ્યું હતું કે શહેરના દરેક વિસ્તારમાં સમાન વિકાસ થાય તે માટે સરકાર અને સ્થાનિક તંત્ર સતત પ્રયત્નશીલ છે. તેમણે નાગરિકોને અપીલ કરી કે નવા બનેલા વિકાસ કાર્યોની સંભાળ રાખવી દરેક જવાબદાર નાગરિકની ફરજ છે, કારણ કે આ યોજનાઓ આવનારી પેઢી માટે રચાયેલી છે.
આ પ્રસંગે કેન્દ્રિય જળશક્તિ મંત્રી શ્રી સી.આર. પાટીલએ જણાવ્યું હતું કે તાપી શુદ્ધિકરણ પ્રોજેક્ટના પરિણામે ઉદ્યોગોથી નીકળતું ગંદું પાણી હવે તાપી નદીમાં ભળતું અટકાવવામાં સફળતા મળી છે.
રાજ્ય સરકારની પબ્લિક હાઉસિંગ રીડેવલપમેન્ટ સ્કીમ-૨૦૧૯ અંતર્ગત કતારગામ વિસ્તારમાં આવેલી ગોટલાવાડી ટેનેમેન્ટની ૧૦૯ આવાસોનું પબ્લિક–પ્રાઈવેટ પાર્ટનરશીપ (PPP) આધારે નિર્માણ પૂર્ણ થયું છે. આ આવાસોના લાભાર્થીઓ માટે મુખ્યમંત્રીએ કમ્પ્યુટરાઇઝ્ડ ડ્રોનું ઉદ્ઘાટન પણ કર્યું હતું.
ડાયમંડ અને ટેક્સટાઇલ કેપિટલ તરીકે ઓળખાતું સુરત આજે ગ્રીન મોબિલિટી અને સસ્ટેનેબલ ડેવલપમેન્ટમાં પણ આગવું સ્થાન ધરાવે છે. ઉદ્યોગ વિકાસના કારણે દેશભરમાંથી લોકો રોજગાર માટે સુરતમાં વસવાટ કરી રહ્યા છે, જેના કારણે સુરતને ‘મિની ઇન્ડિયા’ તરીકે ઓળખ મળી છે.
