રાજ્ય સરકારના મહત્વાકાંક્ષી ‘ગામે ગામ આરોગ્ય કિરણ કાર્યક્રમ’ અંતર્ગત દેવગઢ બારીયા તાલુકાના પ્રાથમિક આરોગ્ય કેન્દ્ર ગુણા હેઠળ આવેલ માજી સરપંચ ફળી, તોયણી–૧ ખાતે આઉટ રીચ OPD (Out Reach OPD)નું સફળતાપૂર્વક આયોજન કરવામાં આવ્યું હતું. આ કાર્યક્રમનો મુખ્ય હેતુ ગ્રામ્ય વિસ્તારોમાં વસતા નાગરિકોને તેમના ગામે જ ગુણવત્તાયુક્ત અને સરળતાથી ઉપલબ્ધ આરોગ્ય સેવાઓ પ્રદાન કરવાનો હતો.

આ પ્રસંગે મુખ્ય જિલ્લા આરોગ્ય અધિકારી શ્રી ડૉ. ઉદય ટીલાવતે સ્થળ પર હાજર રહી આરોગ્ય સેવાઓની સમીક્ષા કરી હતી. તેમણે આરોગ્ય ટીમ દ્વારા આપવામાં આવતી સેવાઓ, વ્યવસ્થાઓ અને દર્દીઓની સારવાર અંગે માહિતી મેળવી હતી તેમજ આરોગ્ય કર્મચારીઓને જરૂરી માર્ગદર્શન આપ્યું હતું.

આ આઉટ રીચ OPD દરમિયાન ગ્રામજનો માટે વિવિધ પ્રકારની આરોગ્ય સેવાઓ ઉપલબ્ધ કરાવવામાં આવી હતી. જેમાં લેબોરેટરી ટેસ્ટ, નૉન કમ્યુનિકેબલ ડિસીઝ (NCD) જેવી કે ડાયાબિટીસ અને બ્લડ પ્રેશરની તપાસ, તેમજ સગર્ભા મહિલાઓ માટે એન્ટી નેટલ કેર (ANC) તપાસ અને ફોલોઅપ લેવામાં આવ્યા હતા. સાથે જ દર્દીઓને ઉપલબ્ધ તમામ સરકારી આરોગ્ય યોજનાઓ અને સારવાર સેવાઓ અંગે વિસ્તૃત માહિતી આપવામાં આવી હતી.

કાર્યક્રમમાં મેડિકલ ઓફિસર ડૉ. ધાર્મિક અને ડૉ. રંજન દ્વારા આરોગ્ય સંબંધિત તમામ સેવાઓ અસરકારક રીતે પૂરી પાડવામાં આવી હતી. આ ઉપરાંત લેબ ટેક્નિશિયન (LT), મલ્ટી પર્પઝ હેલ્થ સુપરવાઈઝર (MPHS), ફીમેલ હેલ્થ સુપરવાઈઝર (FHS), મલ્ટી પર્પઝ હેલ્થ વર્કર (MPHW), ફીમેલ હેલ્થ વર્કર (FHW), આશા કાર્યકરો અને ગ્રામજનોના સહયોગથી સમગ્ર કાર્યક્રમને સફળ બનાવવામાં આવ્યો હતો.

આ આઉટ રીચ OPD દરમિયાન લાભાર્થીઓ અને સગર્ભા મહિલાઓની આરોગ્ય તપાસ, આભા કાર્ડ નોંધણી, પી.એમ.જે.એ.વાય. કાર્ડ નોંધણી, NCD તપાસ, સિકલ સેલ તપાસ તેમજ ટી.બી. (ક્ષયરોગ)ની તપાસ જેવી મહત્વપૂર્ણ સેવાઓ આપવામાં આવી હતી.

આ કાર્યક્રમ દ્વારા ગ્રામ્ય વિસ્તારના નાગરિકોને તેમના ગામે જ આરોગ્ય સેવાઓ ઉપલબ્ધ થતાં આરોગ્ય પ્રત્યે જાગૃતિમાં વધારો થયો હતો. ગ્રામજનોએ કાર્યક્રમને ઉત્સાહભેર પ્રતિસાદ આપ્યો હતો અને રાજ્ય સરકારની આરોગ્ય સેવાઓને વધુ લોકહિતકારી ગણાવી હતી.