વિશ્વ માતૃભાષા દિવસની ઉજવણી નિમિત્તે ગુજરાત સરકારના માહિતી કમિશનર કચેરી દ્વારા માતૃભાષાના સંરક્ષણ અને સંવર્ધન માટે પ્રશંસનીય પહેલ કરવામાં આવી. માહિતી કમિશનર શ્રી કે. એલ. બચાણીની અધ્યક્ષતામાં ‘ગુજરાતી ભાષા’ વિષયક એકદિવસીય વર્કશોપનું આયોજન કરવામાં આવ્યું, જેમાં અધિકારીઓ અને કર્મચારીઓને શાસકીય કામકાજમાં માતૃભાષાના વધતા ઉપયોગ માટે પ્રેરણા આપવામાં આવી.

કાર્યક્રમને સંબોધતા માહિતી કમિશનર શ્રી કે. એલ. બચાણીએ જણાવ્યું કે માતૃભાષા માત્ર સંવાદનું માધ્યમ નથી, પરંતુ તે આપણા સંસ્કાર, સંસ્કૃતિ અને પરંપરાનો જીવંત વહનકાર છે. તેમણે ભારપૂર્વક કહ્યું કે સરકારી કચેરીઓમાં ગુજરાતી ભાષાનો વધુ પ્રચાર-પ્રસાર થવો જોઈએ અને દૈનિક વહીવટી કાર્યોમાં તેનો વ્યાપક ઉપયોગ થવો સમયની માંગ છે. ભાષા જાળવવી એ પોતાની ઓળખ જાળવવા સમાન છે, એમ પણ તેમણે ઉમેર્યું.

આ વર્કશોપ દરમિયાન ‘માતૃભાષા ગૌરવ પ્રતિષ્ઠાન’, ગાંધીનગરના ટ્રસ્ટી શ્રી કિશોરભાઈ જિકડ્રાએ ગુજરાતી ભાષા લેખનના શુદ્ધતા અને સાધનસામગ્રી અંગે માર્ગદર્શન આપ્યું. તેમણે ભાષાની શૈલી, વ્યાકરણની શુદ્ધતા અને યોગ્ય શબ્દપ્રયોગ વિશે વિગતવાર સમજ આપી. ઉપરાંત, શાસકીય પત્રવ્યવહાર અને નોંધપોથીમાં શુદ્ધ અને સરળ ગુજરાતી ભાષાનો ઉપયોગ કેવી રીતે કરવો તે અંગે પ્રાયોગિક સૂચનો આપ્યા.

કાર્યક્રમમાં ઉપસ્થિત અધિકારીઓએ ગુજરાતી ભાષાના પ્રચાર-પ્રસાર માટે સંકલ્પ વ્યક્ત કર્યો. ભાષાની સમૃદ્ધિ જાળવવા અને નવી પેઢીને માતૃભાષા પ્રત્યે ગૌરવની ભાવના વિકસાવવા માટે આવા આયોજન મહત્વપૂર્ણ સાબિત થશે, એવી લાગણી વ્યક્ત કરવામાં આવી.

ગુજરાતી ભાષાના સંવર્ધન માટે માહિતી કમિશનર કચેરી દ્વારા લેવામાં આવેલી આ પહેલને વ્યાપક પ્રતિસાદ મળ્યો છે. વિશ્વ માતૃભાષા દિવસના અવસરે યોજાયેલ આ વર્કશોપ ભાષા પ્રત્યેની લાગણીને વધુ મજબૂત બનાવવાનો સકારાત્મક પ્રયાસ બની રહ્યો છે.