Bardoli સ્થિત પ્રાદેશિક વાહન વ્યવહાર કચેરી (આરટીઓ) દ્વારા નાગરિકોની સુવિધા માટે એક મહત્વપૂર્ણ પહેલ કરવામાં આવી છે. હવે મોટરવાહન અને ડ્રાઈવિંગ લાયસન્સ સંબંધિત મોટાભાગની સેવાઓ ‘ફેસલેસ’ પદ્ધતિ હેઠળ ઘરબેઠા મેળવી શકાશે. આ ડિજિટલ સુવિધાનો લાભ લેવા માટે નાગરિકોએ પોતાના રેકોર્ડમાં નોંધાયેલ મોબાઈલ નંબર ચકાસવો અને જરૂરી હોય તો સુધારવો અત્યંત આવશ્યક છે.

આ સુવિધા અંતર્ગત નાગરિકો માત્ર QR કોડ સ્કેન કરીને સરળતાથી પોતાની માહિતી ચકાસી અને અપડેટ કરી શકશે. ખાસ કરીને મોટરવાહનના દસ્તાવેજો અને ડ્રાઈવિંગ લાયસન્સ સંબંધિત તમામ મહત્વપૂર્ણ સૂચનાઓ હવે સીધા નોંધાયેલા મોબાઈલ નંબર પર પ્રાપ્ત થશે. જેથી સમયસર જરૂરી કાર્યવાહી કરી શકાય અને કોઈપણ પ્રકારની તકલીફ ટાળી શકાય.

કચેરી દ્વારા જણાવવામાં આવ્યું છે કે, મોટરવાહનના PUC સર્ટિફિકેટ અને ઇન્સ્યુરન્સની વેલીડીટી પૂર્ણ થવા અંગેના સંદેશ પણ હવે અપડેટેડ મોબાઈલ નંબર પર મોકલવામાં આવશે. આથી વાહનચાલકોને સમયસર માહિતી મળશે અને કાયદેસર પ્રક્રિયાઓ પૂર્ણ કરવામાં સરળતા રહેશે.

આ પહેલનો મુખ્ય હેતુ નાગરિકોને ઝડપી, પારદર્શક અને સરળ સેવાઓ પૂરી પાડવાનો છે. સાથે જ કચેરીમાં ભીડ ઘટાડવી અને ડિજિટલ ગવર્નન્સને પ્રોત્સાહન આપવાનું પણ મહત્વનું લક્ષ્ય છે.

બારડોલી આરટીઓ કચેરી દ્વારા તમામ નાગરિકોને અપીલ કરવામાં આવી છે કે તેઓ દર્શાવેલ QR કોડ સ્કેન કરીને અથવા પોતાના મોબાઈલ દ્વારા આપવામાં આવેલી પ્રક્રિયા પૂર્ણ કરી પોતાના રેકોર્ડમાં મોબાઈલ નંબર અપડેટ કરે.

આ નવી ડિજિટલ સુવિધા નાગરિકોને સમય અને ખર્ચ બંનેમાં બચત કરાવશે અને વાહન સંબંધિત સેવાઓને વધુ સુગમ બનાવશે.