Tapi જિલ્લામાં આગામી ચોમાસાની ઋતુને ધ્યાનમાં રાખી જિલ્લા વહીવટી તંત્ર અને આપત્તિ વ્યવસ્થાપન તંત્રની પૂર્વ તૈયારીઓની સમીક્ષા માટે જિલ્લા કલેક્ટર Dr. Vipin Garg ના અધ્યક્ષસ્થાને કલેક્ટર કચેરી સભાખંડ ખાતે ખાસ પ્રિ-મોન્સૂન રિવ્યુ બેઠક યોજાઈ હતી. બેઠકમાં ચોમાસા દરમિયાન નાગરિકોની સુરક્ષા સુનિશ્ચિત કરવા, કુદરતી આપદાઓ સમયે જાનમાલનું રક્ષણ કરવા અને વિવિધ વિભાગો વચ્ચે અસરકારક સંકલન સાધવા મુદ્દે વિસ્તૃત ચર્ચા કરવામાં આવી હતી.

કલેક્ટર ડૉ. ગર્ગે તમામ વિભાગોના અધિકારીઓને ડિઝાસ્ટર મેનેજમેન્ટ પ્રોટોકોલનું કડક પાલન કરવા તથા સતર્કતા સાથે કામગીરી હાથ ધરવા સૂચના આપી હતી. તેમણે ખાસ કરીને જિલ્લા તથા તાલુકા કક્ષાના કંટ્રોલરૂમ 24×7 કાર્યરત રાખવા અને વરસાદ સંબંધિત માહિતી દર બે કલાકે ડિઝાસ્ટર શાખાને મોકલવાની સૂચના આપી હતી, જેથી કોઈપણ આપત્તિ સમયે તાત્કાલિક પ્રતિસાદ આપી શકાય.

બેઠકમાં તાલુકાવાર ડિઝાસ્ટર મેનેજમેન્ટ પ્લાન તૈયાર કરવા તેમજ તમામ લાઈન ડિપાર્ટમેન્ટના અધિકારીઓ અને કર્મચારીઓની વિગતો અધતન રાખવા પર વિશેષ ભાર મૂકવામાં આવ્યો હતો. કલેક્ટરશ્રીએ નીચાણવાળા વિસ્તારો, પુરગ્રસ્ત ગામો અને તરવૈયાઓની યાદી તૈયાર રાખવા તથા સંબંધિત ગામોના તલાટી અને સરપંચોના મોબાઈલ નંબર સાથે સંપૂર્ણ ડેટા તૈયાર રાખવા જણાવ્યું હતું.

ચોમાસા પૂર્વે સુરક્ષાત્મક પગલાંના ભાગરૂપે ગટર, નદી-નાળાની સફાઈ, જોખમી વૃક્ષોનું કટીંગ અને પાણીના ભરાવાને રોકવા માટેની કામગીરી ઝડપથી પૂર્ણ કરવા સૂચનાઓ આપવામાં આવી હતી. ઉપરાંત, સંભવિત જોખમરૂપ ભયજનક ઇમારતો અને હોર્ડિંગ્સ દૂર કરવાની કામગીરી તાત્કાલિક પૂર્ણ કરવા પર પણ ભાર મૂકાયો હતો.

આપત્તિ વ્યવસ્થાપનની સજ્જતા અંગે કલેક્ટરશ્રીએ જિલ્લાના તરવૈયાઓ અને આપદામિત્રોની યાદી અપડેટ રાખવા તેમજ લાઈફ બોયા, લાઈફ જેકેટ અને જનરેટર જેવા બચાવ સાધનોની કાર્યક્ષમતાની ચકાસણી કરવા જણાવ્યું હતું.

આ મહત્વપૂર્ણ બેઠકમાં જિલ્લા વિકાસ અધિકારી Ramnivas Bugalia, નિવાસી અધિક કલેક્ટર આર. આર. બોરડ સહિત વિવિધ વિભાગોના ઉચ્ચ અધિકારીઓ, પ્રાંત અધિકારીઓ, મામલતદારો, તાલુકા વિકાસ અધિકારીઓ અને ચીફ ઓફિસરો ઉપસ્થિત રહ્યા હતા.