રાજકોટ શહેરમાં માર્ગ સુરક્ષા વ્યવસ્થાને વધુ કડક અને અસરકારક બનાવવા માટે શહેર માર્ગ સુરક્ષા સમિતિની મહત્વપૂર્ણ બેઠક પોલીસ કમિશનર બ્રજેશ કુમાર ઝાના અધ્યક્ષસ્થાને યોજાઈ હતી. બેઠક દરમિયાન ટ્રાફિક નિયમોના કડક અમલીકરણ, નંબર પ્લેટ ચકાસણી, બ્લેક ફિલ્મ લગાવનાર વાહનચાલકો સામે કાર્યવાહી તેમજ સીસીટીવી સર્વેલન્સ વધારવા અંગે વિગતવાર ચર્ચા કરવામાં આવી હતી.

પોલીસ કમિશનરે ખાસ સૂચના આપી કે જે વાહનો પર નંબર પ્લેટ વગર અથવા ગેરકાયદેસર બ્લેક ફિલ્મ લગાવીને ફરતા હોય, તેવા વાહનચાલકોની સંપૂર્ણ હિસ્ટ્રી ચકાસવામાં આવે. નિયમોનું ઉલ્લંઘન કરનાર સામે કડક દંડાત્મક પગલાં લેવા અને ફરી ગુનાહિત પ્રવૃત્તિ ન કરે તે માટે વિશેષ ડ્રાઈવ હાથ ધરવાની વાત પર ભાર મૂકાયો. નંબર પ્લેટ વેરિફિકેશન અભિયાનને વધુ ગતિ આપવા માટે ટ્રાફિક શાખાને દિશાનિર્દેશ આપવામાં આવ્યા.

બેઠકમાં જાહેર પરિવહન વ્યવસ્થાની સલામતી મુદ્દે પણ ચર્ચા થઈ. ખાસ કરીને બસ ડ્રાઈવરોના નિયમિત આંખોના ચેકઅપ કરાવવા સૂચના આપવામાં આવી, જેથી માર્ગ અકસ્માતોની સંભાવના ઘટાડવામાં મદદ મળે. ચોરાહાઓ પર ડાબી વળાંક (લેફ્ટ ટર્ન) વ્યવસ્થા સરળ અને સુવ્યવસ્થિત બને તે માટે માર્ગ ચિહ્નો, સ્પીડ બ્રેકર અને સ્પષ્ટ લેન માર્કિંગ કરવાની કામગીરી ઝડપી બનાવવા સૂચના અપાઈ.

હાઈવે સહિત શહેરના મુખ્ય માર્ગો પર સીસીટીવી કેમેરા વધારવા અને આધુનિક સર્વેલન્સ સિસ્ટમ દ્વારા સતત મોનિટરિંગ કરવાની યોજના પર પણ ચર્ચા થઈ. ટ્રાફિક નિયમોનું પાલન થાય તે માટે ટેકનોલોજી આધારિત અમલવારીને પ્રાથમિકતા આપવા પર ભાર મૂકાયો.

પોલીસ કમિશનરે જણાવ્યું કે માર્ગ સુરક્ષા માત્ર પોલીસની જ નહીં પરંતુ નાગરિકોની પણ સંયુક્ત જવાબદારી છે. ટ્રાફિક નિયમોનું પાલન, યોગ્ય નંબર પ્લેટ અને સુરક્ષિત ડ્રાઈવિંગ દ્વારા જ અકસ્માતમુક્ત શહેરનું સ્વપ્ન સાકાર થઈ શકે છે. રાજકોટ શહેરમાં માર્ગ સુરક્ષા મજબૂત બનાવવા માટે પ્રશાસન અને નાગરિકો વચ્ચે સહયોગ વધારવાનો સંકલ્પ વ્યક્ત કરવામાં આવ્યો.