પાટણ ખાતે જિલ્લા વિકાસ અધિકારી શ્રી સી. એલ. પટેલના અધ્યક્ષસ્થાને જિલ્લા સેવા સદનમાં મહત્વપૂર્ણ સમીક્ષા બેઠક યોજાઈ હતી. આ બેઠકમાં જિલ્લાના વિવિધ વિકાસલક્ષી તથા જનહિતના મુદ્દાઓ પર વિગતવાર ચર્ચા કરવામાં આવી હતી. ખાસ કરીને કાયદા અને વ્યવસ્થા, માર્ગ સલામતી, તાલુકા ગૌચર વિકાસ, વનીકરણ, આરોગ્ય સેવાઓ, જિલ્લા બાળ મજૂરી નાબૂદી તેમજ કુપોષણ જેવા અગત્યના વિષયો પર અધિકારીઓને જરૂરી માર્ગદર્શન આપવામાં આવ્યું હતું.

બેઠક દરમિયાન જિલ્લા વિકાસ અધિકારીએ કાયદો અને વ્યવસ્થા મજબૂત રાખવા માટે પોલીસ તથા સંબંધિત વિભાગોને સુચનાઓ આપી હતી. માર્ગ સલામતી અંગે અકસ્માતોને રોકવા માટે ટ્રાફિક નિયમોનું કડક પાલન કરાવવા તેમજ જાગૃતિ અભિયાન વધુ અસરકારક બનાવવાના નિર્દેશ આપ્યા હતા. તાલુકા ગૌચર વિકાસ માટે જમીનોનું સંરક્ષણ અને યોગ્ય ઉપયોગ થાય તે માટે ખાસ ધ્યાન આપવા જણાવ્યું હતું.

વનીકરણ અભિયાનને વધુ ગતિ આપવા માટે અધિકારીઓને નિર્ધારિત લક્ષ્યાંકો પૂર્ણ કરવા પર ભાર મુકવામાં આવ્યો હતો. આરોગ્ય વિભાગને ગ્રામ્ય વિસ્તારોમાં આરોગ્ય સેવાઓ વધુ સુલભ બને તે માટે કામગીરી તેજ કરવાની સૂચના આપવામાં આવી હતી. બાળ મજૂરી નાબૂદી માટે સંબંધિત વિભાગોને સંકલન સાથે કાર્ય કરવા તેમજ કડક કાર્યવાહી કરવા સૂચિત કરવામાં આવ્યું હતું.

કુપોષણ જેવી ગંભીર સમસ્યાને દૂર કરવા માટે આંગણવાડી કેન્દ્રો તથા આરોગ્ય કર્મચારીઓ દ્વારા નિયમિત દેખરેખ રાખવા અને પોષણયુક્ત આહાર અંગે જાગૃતિ વધારવા માટે પણ માર્ગદર્શન આપવામાં આવ્યું હતું.

આ બેઠકમાં જિલ્લા કક્ષાના વિવિધ વિભાગોના અધિકારીઓ હાજર રહ્યા હતા અને તમામે પોતાના વિભાગોની કામગીરી અંગે વિગતવાર અહેવાલ રજૂ કર્યા હતા. જિલ્લા વિકાસ અધિકારીએ તમામ વિભાગોને સંકલન સાથે કામ કરીને જિલ્લામાં સર્વાંગી વિકાસ સુનિશ્ચિત કરવા અપીલ કરી હતી.