નર્મદા જિલ્લાના દેડિયાપાડા તાલુકાની ખેડૂત મહિલા શર્મિલાબેન વસાવાએ કુદરતી ખેતી અપનાવી આત્મનિર્ભર બનવાની પ્રેરણાદાયી સફર શરૂ કરી છે. ગુજરાત નેચરલ ડેવલપમેન્ટ બોર્ડ તથા આત્મા પ્રોજેક્ટના માર્ગદર્શન હેઠળ તેમણે કુદરતી ખેતી પદ્ધતિ અપનાવી અને આજે તેઓ ગ્રામિણ મહિલા સશક્તિકરણનું જીવંત ઉદાહરણ બની ઊભરી આવ્યા છે.શર્મિલાબેન વસાવાએ રાસાયણિક ખાતર અને જંતુનાશકોનો ઉપયોગ છોડીને સંપૂર્ણપણે કુદરતી પદ્ધતિથી ખેતી શરૂ કરી. તેમના ખેતરમાં કુદરતી રીતે ઉગાડવામાં આવેલ તુવેરના છોડ 10 ફૂટથી વધુ ઊંચાઈ સુધી વધ્યા છે, જે આસપાસના વિસ્તારોમાં આકર્ષણનું કેન્દ્ર બન્યા છે. આ દૃશ્ય જોવા માટે આસપાસના ખેડૂતો અને ગ્રામજનો મોટી સંખ્યામાં આવી રહ્યા છે, જેથી કુદરતી ખેતી પ્રત્યે જાગૃતિ વધતી જઈ રહી છે.તુવેર ઉપરાંત શર્મિલાબેને લસણ, કોબીજ, હળદર સહિતના પાકો પણ કુદરતી રીતે ઉગાડ્યા છે. તેઓ આ પાકોનું ઘરેથી જ માર્કેટિંગ કરીને સારી આવક મેળવી રહ્યા છે. ઓછા ખર્ચે વધુ ઉત્પાદન અને ઉત્તમ ગુણવત્તાવાળા પાકને કારણે તેમની આર્થિક સ્થિતિમાં નોંધપાત્ર સુધારો થયો છે. કુદરતી ખેતીના કારણે જમીનની ઉર્વરતા પણ જળવાઈ રહી છે, જે ભવિષ્યની ખેતી માટે લાભદાયી સાબિત થઈ રહી છે.શર્મિલાબેન વસાવાની આ સફળતા આજે અન્ય મહિલાઓ માટે પ્રેરણારૂપ બની છે. ગ્રામિણ વિસ્તારોમાં મહિલાઓ કુદરતી ખેતી તરફ આગળ વધી રહી છે, જે આત્મનિર્ભર ભારતના સંકલ્પને મજબૂત બનાવે છે. મહિલા ખેડૂતોએ પોતાની ક્ષમતાથી ખેતી ક્ષેત્રે નવી ઓળખ ઊભી કરી છે, તે આ ઉદાહરણથી સ્પષ્ટ થાય છે.આ સફળતા બદલ શર્મિલાબેન વસાવાએ ગુજરાત સરકાર, રાજ્યપાલ, ગુજરાત નેચરલ ડેવલપમેન્ટ બોર્ડ, આત્મા પ્રોજેક્ટ તેમજ બાગાયત વિભાગનો આભાર વ્યક્ત કર્યો હતો. તેમણે જણાવ્યું હતું કે સરકારના માર્ગદર્શન અને સહયોગથી જ તેઓ કુદરતી ખેતીમાં સફળ બની શક્યા છે. તેમની આ પ્રેરણાદાયી યાત્રા નર્મદા જિલ્લાની ઓળખ બની રહી છે.