ગુજરાતના મુખ્યમંત્રી શ્રી ભૂપેન્દ્રભાઈ પટેલના વરદ હસ્તે જામનગર જિલ્લાની ગ્રામ્ય વિકાસયાત્રાને નવી ગતિ મળી છે. જામનગર તા. ૦૨ ફેબ્રુઆરીના રોજ આણંદ જિલ્લાના ભાદરણ મુકામેથી સમગ્ર રાજ્યમાં કુલ ૨૬૬૬ નવીન ગ્રામ પંચાયત ભવનોના ઇ-ખાતમુહૂર્ત તેમજ ૧૧૪ ગામોમાં ‘મુખ્યમંત્રી ગ્રામોત્થાન યોજના’ના પ્રારંભનો રાજ્યકક્ષાનો કાર્યક્રમ યોજાયો હતો. આ કાર્યક્રમ સાથે જોડાઈને જામનગર જિલ્લાનું જિલ્લા કક્ષાનું આયોજન હર્ષદપુર મુકામે ટુ-વે કનેક્ટિવિટી દ્વારા યોજાયું હતું.

આ કાર્યક્રમ અંતર્ગત જામનગર જિલ્લાની કુલ ૬૬ ગ્રામ પંચાયતના નવીન ભવનોનું ખાતમુહૂર્ત સંપન્ન થયું હતું. પંચાયત ભવન જેવી પાયાની સુવિધાઓથી ગ્રામ્ય વિસ્તારના વહીવટ, વિકાસ અને લોકસેવામાં વધુ મજબૂતી આવશે. આ ઉપરાંત વર્ષ ૨૦૨૫–૨૬ દરમિયાન ‘મુખ્યમંત્રી ગ્રામોત્થાન યોજના’ હેઠળ ૧૦,૦૦૦થી વધુ વસ્તી ધરાવતી અને હજી નગરપાલિકામાં સમાવિષ્ટ ન થયેલી ગ્રામ પંચાયતોમાં શહેર જેવી સુવિધાઓ વિકસાવવાના હેતુથી જામનગર જિલ્લાના લાલપુર અને જોડીયા ગ્રામ પંચાયતોના કુલ રૂ. ૧૦૭૦ લાખના વિકાસલક્ષી કામોને મંજૂરી માટે સરકારમાં મોકલવામાં આવ્યા છે.

હર્ષદપુર ખાતે યોજાયેલા કાર્યક્રમમાં જિલ્લા પંચાયત પ્રમુખ શ્રીમતી મેયબેન ગરસર, જામનગર ગ્રામ્યના ધારાસભ્ય શ્રી રાઘવજીભાઈ પટેલ તથા જિલ્લા વિકાસ અધિકારી શ્રી અંકિત પન્નુની પ્રેરક ઉપસ્થિતિ રહી હતી. આ ઉપરાંત નાયબ જિલ્લા વિકાસ અધિકારી શ્રી વી.આર. માંકડીયા, તાલુકા વિકાસ અધિકારીશ્રીઓ, જિલ્લા પંચાયત ઉપપ્રમુખ શ્રી હસમુખભાઈ કણજારીયા, જિલ્લા ભાજપ અધ્યક્ષ ડો. વિનોદ ભંડેરી સહિત અનેક મહાનુભાવો ઉપસ્થિત રહ્યા હતા.

આ પ્રસંગે ધારાસભ્ય શ્રી રાઘવજીભાઈ પટેલે જણાવ્યું હતું કે “ગામડું એ ભારતનો આત્મા છે અને ગ્રામ પંચાયત ભવન જેવી પાયાની સુવિધાઓથી ગ્રામીણ વિકાસ વધુ સુદ્રઢ બનશે.” હર્ષદપુર સિવાય અન્ય તાલુકા મથકો પર પણ અંદાજે ૬૫ જેટલા ગ્રામ પંચાયત ભવનોનું ખાતમુહૂર્ત કરીને ગ્રામ્ય ઉત્થાનની આ પહેલને વધુ વેગ આપવામાં આવ્યો હતો.

આ સમગ્ર કાર્યક્રમ ગ્રામ્ય ગુજરાતને આધુનિક સુવિધાઓ સાથે વિકાસના માર્ગે આગળ વધારવાનું દૃઢ સંકલ્પ દર્શાવે છે. 🌱🏛️