Junagadh district માં પેટ્રોલ અને ડીઝલના પુરવઠાને લઈને ફેલાતી અફવાઓ વચ્ચે જિલ્લા વહીવટી તંત્રએ નાગરિકોને શાંતિ જાળવવા અને ખોટી માહિતીથી દોરવાઈને પેટ્રોલ પંપો પર ભીડ ન કરવા અનુરોધ કર્યો છે. જિલ્લા કલેક્ટર Anilkumar Ranavasia ના માર્ગદર્શન હેઠળ તંત્ર દ્વારા સતત મોનિટરિંગ કરવામાં આવી રહ્યું છે અને પુરવઠો જળવાઈ રહે તે માટે જરૂરી તમામ વ્યવસ્થાઓ સુનિશ્ચિત કરવામાં આવી છે.

જિલ્લામાં આજે સાંજે ૪ વાગ્યાની સ્થિતિએ અંદાજે ૮.૨૦ લાખ લિટર પેટ્રોલ અને ૧૧.૭૧ લાખ લિટર ડીઝલનો જથ્થો ઉપલબ્ધ હોવાનું તંત્ર દ્વારા જાહેર કરવામાં આવ્યું છે. આ જથ્થો નાગરિકોની દૈનિક જરૂરિયાતોને પૂર્ણ કરવા માટે પૂરતો હોવાનું પણ સ્પષ્ટ કરવામાં આવ્યું છે. તેથી કોઈપણ પ્રકારની ગભરાટ કે અનાવશ્યક ખરીદી કરવાની જરૂર નથી.

પરિસ્થિતિની વાસ્તવિક સ્થિતિ જાણવા માટે જિલ્લા કલેક્ટરશ્રીએ Junagadh city ના વિવિધ પેટ્રોલ પંપોની મુલાકાત લીધી હતી અને પુરવઠાની સમીક્ષા કરી હતી. તેમની સૂચના મુજબ મામલતદાર અને અન્ય અધિકારીઓએ પણ જિલ્લાના અલગ-અલગ વિસ્તારોમાં જઈને પેટ્રોલ પંપોની રૂબરૂ તપાસ કરી હતી. આ દરમિયાન પંપ પર ઉપલબ્ધ જથ્થો, વિતરણ વ્યવસ્થા અને અન્ય સંબંધિત મુદ્દાઓ અંગે વિગતવાર માહિતી મેળવી હતી.

કલેક્ટરશ્રીએ સ્પષ્ટ સૂચના આપી છે કે પેટ્રોલ-ડીઝલની અછત અંગે સોશિયલ મીડિયા કે અન્ય માધ્યમો દ્વારા ભ્રામક માહિતી ફેલાવનાર તત્વો સામે કડક કાર્યવાહી કરવામાં આવશે. સાથે જ સંગ્રહખોરી કરનારાઓ સામે પણ કાયદેસરની કાર્યવાહી થશે.

જિલ્લા વહીવટી તંત્રએ નાગરિકોને અપીલ કરી છે કે તેઓ અફવાઓથી દૂર રહે અને બિનજરૂરી રીતે પેટ્રોલ પંપ પર લાઈનો લગાવીને પોતાની તેમજ અન્ય લોકોની અસુવિધા ન વધારવી. હાલમાં જિલ્લામાં પેટ્રોલ અને ડીઝલની આવક તથા વિતરણ પ્રક્રિયા સંપૂર્ણપણે સામાન્ય છે અને સતત પુરવઠો જળવાઈ રહે તે માટે તંત્ર સજ્જ છે.