Jamnagar તા. 19 માર્ચે જિલ્લા પંચાયતની વર્તમાન ટર્મ પૂર્ણ થયા બાદ વહીવટદાર તરીકે પદભાર સંભાળનાર જિલ્લા કલેક્ટર Ketan Thakkarએ રજાના દિવસે પણ ઉચ્ચસ્તરીય સમીક્ષા બેઠક યોજી વહીવટી તંત્રમાં ગતિશીલતા લાવવા પ્રેરક પહેલ કરી છે.

જિલ્લા પંચાયતના સભાખંડ ખાતે યોજાયેલી આ બેઠકમાં જિલ્લા વિકાસ અધિકારી Ankit Pannu, નાયબ જિલ્લા વિકાસ અધિકારીઓ તથા વિવિધ શાખાઓના વડાઓ અને ઉચ્ચ અધિકારીઓ ઉપસ્થિત રહ્યા હતા. પદભાર સંભાળ્યા બાદ કલેક્ટરશ્રીએ તાત્કાલિક તમામ વિભાગોની કામગીરીની સર્વગ્રાહી સમીક્ષા હાથ ધરી અને પડતર કામોના ત્વરિત નિકાલ માટે કડક સૂચનાઓ આપી હતી.

કલેક્ટર કેતન ઠક્કરે બેઠક દરમિયાન ભારપૂર્વક જણાવ્યું હતું કે, વહીવટી પ્રક્રિયાના કારણે પ્રજાના કોઈપણ કામમાં વિલંબ થવો જોઈએ નહીં. તેમણે તમામ વિકાસકાર્યો નિર્ધારિત સમયમર્યાદામાં પૂર્ણ કરવા અનિવાર્ય ગણાવ્યા હતા. ખાસ કરીને લાંબા સમયથી પડતર રહેલા પ્રજાલક્ષી કામોનો ઝડપથી નિકાલ લાવી સરકારી યોજનાઓનો લાભ છેવાડાના માનવી સુધી પહોંચે તે સુનિશ્ચિત કરવા જણાવ્યું હતું.

આ ઉપરાંત, કલેક્ટરશ્રીએ અધિકારીઓને માર્ગદર્શન આપતાં જણાવ્યું કે જો કોઈ પ્રોજેક્ટમાં કાયદાકીય અથવા ટેકનિકલ અડચણ આવે તો વિલંબ કર્યા વિના તાત્કાલિક યોગ્ય માર્ગદર્શન મેળવી સમસ્યાનો ઉકેલ લાવવો જોઈએ. તેમણે સ્પષ્ટ કહ્યું કે વિકાસની ગતિમાં કોઈપણ પ્રકારનો અવરોધ સહન કરવામાં આવશે નહીં.

કલેક્ટરશ્રીની આ સક્રિય અને પ્રતિબદ્ધ કાર્યશૈલીના કારણે જિલ્લા પંચાયતના વહીવટી માળખામાં નવી ઉર્જાનો સંચાર જોવા મળ્યો છે. અધિકારીઓમાં પણ કાર્ય પ્રત્યે વધુ જવાબદારી અને તત્પરતા વધી છે.

જામનગર જિલ્લામાં વહીવટી તંત્રને વધુ અસરકારક અને જનકેન્દ્રિત બનાવવા માટે કલેક્ટર કેતન ઠક્કરની આ પહેલ પ્રશંસનીય માનવામાં આવી રહી છે. આવનારા સમયમાં આ પ્રકારની સક્રિયતા વિકાસ કાર્યોને વધુ વેગ આપશે અને નાગરિકોને ઝડપી અને અસરકારક સેવા પ્રાપ્ત થશે.