ઉનાળાની તીવ્ર ગરમી અને વધતી હીટવેવની પરિસ્થિતિને ધ્યાનમાં રાખીને આણંદ જિલ્લાના આરોગ્ય તંત્ર દ્વારા આગોતરા તૈયારી હાથ ધરવામાં આવી છે. આ સંદર્ભે આણંદની જનરલ હોસ્પિટલ ખાતે ખાસ ઇમર્જન્સી વોર્ડ તૈયાર કરવામાં આવ્યો છે, જેથી હીટવેવથી પીડિત દર્દીઓને તાત્કાલિક અને યોગ્ય સારવાર મળી શકે.

હોસ્પિટલ તંત્ર દ્વારા જણાવાયું હતું કે હીટસ્ટ્રોક, ડિહાઇડ્રેશન અને ગરમી સંબંધિત બીમારીઓના કેસોમાં વધારો થવાની શક્યતા હોવાથી તમામ જરૂરી વ્યવસ્થાઓ કરવામાં આવી છે. ઇમર્જન્સી વોર્ડમાં પૂરતા પ્રમાણમાં બેડ, કૂલિંગ સિસ્ટમ, ઓ.આર.એસ. પેકેટ, આઈ.વી. ફ્લુઈડ્સ તથા જરૂરી દવાઓ ઉપલબ્ધ રાખવામાં આવી છે. તબીબો અને નર્સિંગ સ્ટાફને પણ ૨૪ કલાક ડ્યૂટી પર તૈનાત રાખવામાં આવ્યા છે.

આરોગ્ય અધિકારીઓએ લોકોને અતિઆવશ્યક હોય ત્યારે જ બપોરના સમયે બહાર નીકળવા, પૂરતું પાણી પીવું, હળવા અને ઢીલા કપડાં પહેરવા તેમજ ગરમીથી બચવા માટે છાંયડાવાળા સ્થળોએ રહેવા અપીલ કરી છે. ખાસ કરીને વૃદ્ધો, બાળકો અને શ્રમિક વર્ગને વધુ સાવચેત રહેવાની સલાહ આપવામાં આવી છે.

જિલ્લા આરોગ્ય વિભાગ દ્વારા ગ્રામ્ય તથા શહેરી વિસ્તારોમાં જાગૃતિ અભિયાન પણ શરૂ કરવામાં આવ્યું છે, જેમાં લોકોને હીટવેવના લક્ષણો અને બચાવ અંગે માહિતી આપવામાં આવી રહી છે. સાથે સાથે ૧૦૮ ઇમર્જન્સી સેવા પણ સજ્જ રાખવામાં આવી છે જેથી જરૂર પડ્યે દર્દીઓને ઝડપથી હોસ્પિટલ સુધી પહોંચાડી શકાય.

આણંદ જનરલ હોસ્પિટલમાં કરવામાં આવેલી આ આગોતરી તૈયારીઓથી હીટવેવ દરમિયાન દર્દીઓને ઝડપી સારવાર મળશે અને જાનહાનિ ટાળવામાં મદદરૂપ થશે. જિલ્લા તંત્ર દ્વારા “ઝીરો કેઝ્યુલ્ટી”ના લક્ષ્ય સાથે આરોગ્ય સેવાઓને મજબૂત બનાવવાનો પ્રયત્ન કરવામાં આવી રહ્યો છે.