ગાંધીનગર ખાતે રાજ્યમાં પાઇપલાઇન દ્વારા મળતા પ્રાકૃતિક ગેસ (PNG) અને પેટ્રોલિયમ ઉત્પાદનોની ઉપલબ્ધતા અને વિતરણ વ્યવસ્થા અંગે ઉચ્ચસ્તરીય સમીક્ષા બેઠક યોજાઈ હતી. આ બેઠકનું અધ્યક્ષસ્થાન રાજ્યના મુખ્યમંત્રી ભુપેન્દ્રભાઈ પટેલે કર્યું હતું. બેઠકમાં રાજ્યમાં ગેસ સપ્લાયની વર્તમાન સ્થિતિ, ભવિષ્યની જરૂરિયાતો અને નાગરિકોને સરળતાથી ગેસ ઉપલબ્ધ કરાવવા માટેના પગલાં અંગે વિસ્તૃત ચર્ચા કરવામાં આવી હતી.

બેઠક દરમિયાન મુખ્યમંત્રી ભુપેન્દ્રભાઈ પટેલે મહત્વપૂર્ણ નિર્ણય લીધો કે રાજ્યના એવા વિસ્તારોમાં જ્યાં સિટી ગેસ ડિસ્ટ્રિબ્યુશન માટે પાઇપલાઇન નેટવર્ક ઉપલબ્ધ છે, ત્યાં રેસ્ટોરન્ટ, હોટેલ, શૈક્ષણિક સંસ્થાઓ તેમજ સામાજિક અને ધાર્મિક સંસ્થાઓ તરફથી તેમની જરૂરિયાત મુજબ નવા PNG કનેક્શન માટે માંગ કરવામાં આવે તો તે કનેક્શન તાત્કાલિક અસરથી આપવામાં આવશે. આ નિર્ણયથી વ્યાપારિક તથા સંસ્થાગત ક્ષેત્રોને મોટી રાહત મળશે અને સ્વચ્છ તથા સસ્તી ઊર્જાનો ઉપયોગ વધશે.

બેઠકમાં અધિકારીઓએ રાજ્યમાં પ્રાકૃતિક ગેસ સપ્લાયની હાલની સ્થિતિ અંગે માહિતી આપી હતી. અધિકારીઓના જણાવ્યા મુજબ રાજ્યમાં ઘરગથ્થુ ઉપયોગ માટે પાઇપલાઇન દ્વારા આપવામાં આવતા PNG ગેસ માટે પૂરતી માત્રામાં ગેસ ઉપલબ્ધ છે. રાજ્યના નાગરિકોને ઘરઆંગણે ગેસ સપ્લાયમાં કોઈ પ્રકારની અછત ન પડે તે માટે સરકાર સતત મોનિટરિંગ કરી રહી છે.

મુખ્યમંત્રીશ્રીએ જણાવ્યું હતું કે રાજ્યના નાગરિકોને સરળ, સુરક્ષિત અને પર્યાવરણમિત્ર ઊર્જા ઉપલબ્ધ કરાવવી રાજ્ય સરકારની પ્રાથમિકતા છે. PNG ગેસનો ઉપયોગ વધવાથી એલપિજી સિલિન્ડર પરનો ભાર ઘટશે અને પ્રદૂષણમાં પણ ઘટાડો થશે. સાથે સાથે ઉદ્યોગો અને વ્યાપારિક સંસ્થાઓ માટે પણ ગેસનો ઉપયોગ ખર્ચ ઘટાડવામાં મદદરૂપ સાબિત થશે.

બેઠકમાં અધિકારીઓને સૂચના આપવામાં આવી હતી કે શહેરો તથા નગરોમાં પાઇપલાઇન ગેસ નેટવર્કના વિસ્તરણ માટે ઝડપથી કામગીરી કરવામાં આવે. વધુમાં વધુ નાગરિકો અને સંસ્થાઓને PNG કનેક્શન મળી રહે તે માટે પ્રક્રિયાને સરળ અને ઝડપી બનાવવાની પણ સૂચના આપવામાં આવી હતી.

રાજ્ય સરકારના આ નિર્ણયથી આવનારા સમયમાં PNG ગેસનો ઉપયોગ વધુ પ્રમાણમાં વધવાની સંભાવના છે અને નાગરિકોને સ્વચ્છ અને વિશ્વસનીય ઊર્જા ઉપલબ્ધ કરાવવામાં મહત્વપૂર્ણ પગલું સાબિત થશે.