છોટાઉદેપુર જિલ્લામાં હોળીના મહાપર્વની ઉજવણી દિવાળી કરતાં પણ વધુ ઉત્સાહ અને ઉમંગ સાથે કરવામાં આવે છે. આદિવાસી સંસ્કૃતિથી સમૃદ્ધ આ જિલ્લામાં હોળીના સાત દિવસ પહેલાંથી જ ‘ભંગોરિયા મેળા’ની શરૂઆત થતી હોય છે, જે અહીંની પરંપરા અને સામાજિક એકતાનું પ્રતિક માનવામાં આવે છે. આ વર્ષે રંગપુર સઢલી હાટથી પરંપરાગત ભંગોરિયા મેળાનો વિધિવત પ્રારંભ થતાં જ સમગ્ર જિલ્લામાં ઉત્સવી માહોલ છવાઈ ગયો છે.

ભંગોરિયા મેળો માત્ર એક હાટ કે બજાર નથી, પરંતુ આદિવાસી સમાજની સંસ્કૃતિ, પરંપરા અને સામૂહિક જીવનશૈલીનું જીવંત પ્રતિબિંબ છે. જ્યાં સાપ્તાહિક હાટ ભરાય છે, ત્યાં હોળી પૂર્વે વિશેષ મેળાનું આયોજન કરવામાં આવે છે. ગ્રામજનો માટે આ મેળો આનંદ, ખરીદી અને સાંસ્કૃતિક અભિવ્યક્તિનું અનોખું મંચ છે.

રંગપુર સઢલી ખાતે યોજાયેલા મેળામાં પરંપરાગત વાધ્યોના નાદ સાથે એકસરખા પહેરવેશમાં સજ્જ યુવક-યુવતીઓ અને મહિલાઓએ શિસ્તબદ્ધ નૃત્ય રજૂ કરી સૌનું મન મોહી લીધું હતું. રામઢોલના ગાજતા તાલે સમગ્ર મેદાન ગૂંજી ઉઠ્યું હતું. આસપાસના ગામોમાંથી મોટી સંખ્યામાં લોકો રોજિંદી જીવન જરૂરી ચીજવસ્તુઓની ખરીદી માટે ઉમટી પડ્યા હતા, જેના કારણે મેળામાં ખાસ રોનક જોવા મળી હતી.

આ પ્રસંગે છોટાઉદેપુરના સાંસદ જશુભાઈ રાઠવા પણ હાજર રહ્યા હતા. તેમણે સ્થાનિક આદિવાસી ટુકડીઓ સાથે પરંપરાગત નૃત્યમાં જોડાઈને ઉત્સાહ વધાર્યો હતો. તેમના ઉપસ્થિતિથી ગ્રામજનોમાં વિશેષ આનંદ અને ગૌરવની લાગણી જોવા મળી હતી.

ભંગોરિયા મેળો આદિવાસી યુવાનો માટે પરંપરાગત રીતે જીવનસાથી પસંદ કરવાની અનોખી પરંપરા સાથે પણ જોડાયેલો છે. આ મેળાઓ દ્વારા આદિવાસી સંસ્કૃતિનું સંવર્ધન અને સંરક્ષણ થાય છે, જે આજના આધુનિક યુગમાં પણ પોતાની ઓળખ જાળવી રાખવામાં સફળ રહ્યું છે.

છોટાઉદેપુર જિલ્લામાં હોળી મહોત્સવ અને ભંગોરિયા મેળાની આ ભવ્ય ઉજવણી સ્થાનિક અર્થતંત્રને પણ પ્રોત્સાહન આપે છે અને સાંસ્કૃતિક એકતાને વધુ મજબૂત બનાવે છે.