દીકરીઓને જીવલેણ સર્વાઇકલ કેન્સરથી સુરક્ષિત રાખવા માટે રાજ્ય સરકાર દ્વારા વિશાળ HPV રસીકરણ અભિયાન શરૂ કરવામાં આવ્યું છે. આ અભિયાન હેઠળ અંદાજિત 5.50 લાખ 14 વર્ષની કિશોરીઓને મફતમાં HPV વેક્સિન આપવામાં આવશે. નિષ્ણાત ડોક્ટરો અને આરોગ્ય વિભાગે માતા-પિતાને આ અભિયાનમાં જોડાઈ દીકરીઓને સમયસર રસી અપાવવા અપીલ કરી છે.

તબીબોના જણાવ્યા મુજબ સર્વાઇકલ કેન્સરનું મુખ્ય કારણ Human Papillomavirus છે. ખાસ કરીને HPVના 16 અને 18 પ્રકારના વાયરસ મોટાભાગના કેસ માટે જવાબદાર ગણાય છે. આ વાયરસ સામે રક્ષણ આપવા માટે HPV vaccine ખૂબ અસરકારક માનવામાં આવે છે.

અમદાવાદના Gujarat Cancer and Research Institute (GCRI)ના નિષ્ણાત ડોક્ટરોએ જણાવ્યું હતું કે HPV વેક્સિન સંપૂર્ણપણે સુરક્ષિત છે અને દીકરીઓને જીવલેણ સર્વાઇકલ કેન્સરથી બચાવવા માટે ખૂબ જરૂરી છે. ડોક્ટરોના મત મુજબ 14 વર્ષની ઉંમરે આપવામાં આવતી આ રસી શરીરના ઈમ્યુન સિસ્ટમને મજબૂત બનાવે છે અને વાયરસ સામે અસરકારક રક્ષણ પૂરું પાડે છે.

વિશ્વના 100થી વધુ દેશોમાં HPV વેક્સિન સફળતાપૂર્વક આપવામાં આવી રહી છે અને તેની અસરકારકતા સાબિત થઈ ચૂકી છે. તબીબી નિષ્ણાતોના જણાવ્યા અનુસાર આ રસી દીકરીઓના આરોગ્ય માટે મહત્વપૂર્ણ છે અને તે ભવિષ્યમાં સર્વાઇકલ કેન્સરના જોખમને નોંધપાત્ર રીતે ઘટાડે છે.

આ ઉપરાંત World Health Organizationની ગ્લોબલ એડવાઈઝરી કમિટીએ પણ સ્પષ્ટ કર્યું છે કે HPV વેક્સિન અને વંધ્યત્વ (infertility) અથવા અન્ય ગંભીર સાઇડ ઇફેક્ટ્સ વચ્ચે કોઈ વૈજ્ઞાનિક સંબંધ નથી. તેથી માતા-પિતાએ કોઈપણ ભ્રમમાં આવ્યા વગર પોતાની દીકરીઓને સમયસર વેક્સિન અપાવવી જોઈએ.

રાજ્ય સરકાર દ્વારા આપવામાં આવતી આ મફત રસીકરણ યોજના કિશોરીઓના આરોગ્ય સુરક્ષામાં મહત્વપૂર્ણ પગલું માનવામાં આવી રહી છે. આરોગ્ય વિભાગે પણ માતા-પિતાને અપીલ કરી છે કે તેઓ શાળાઓ અને આરોગ્ય કેન્દ્રોમાં ચાલી રહેલા રસીકરણ અભિયાનમાં સહભાગી બની પોતાની દીકરીઓને સર્વાઇકલ કેન્સર જેવા ગંભીર રોગથી બચાવવા આગળ આવે.

આ અભિયાન દ્વારા રાજ્યમાં કિશોરીઓના આરોગ્ય અંગે જાગૃતિ વધારવા અને ભવિષ્યમાં સર્વાઇકલ કેન્સરના કેસોમાં ઘટાડો લાવવાનો સરકારનો મુખ્ય ઉદ્દેશ છે.