વડોદરા અને આનંદ જિલ્લાઓને જોડતા ગંભીરા બ્રિજ પર તાજેતરમાં શરૂ કરાયેલ તાત્કાલિક વ્યવસ્થા બાદ ટ્રાફિકમાં નોંધપાત્ર વધારો જોવા મળ્યો છે. માર્ગ અને મકાન વિભાગ (R&B) દ્વારા કરવામાં આવેલા 24 કલાકના ટ્રાફિક સેન્સસમાં બાઈકર્સની મોટી સંખ્યામાં અવરજવર નોંધાઈ છે, જે લોકો માટે આ બ્રિજ કેટલો મહત્વનો છે તે દર્શાવે છે.

વિભાગ દ્વારા આપવામાં આવેલી માહિતી અનુસાર, માત્ર એક જ દિવસમાં આશરે 48 હજાર જેટલા બાઈકર્સે બ્રિજ પરથી પસાર થયા હતા. ખાસ કરીને સવારે 9 થી 10 વાગ્યા અને સાંજે 5 થી 6 વાગ્યા વચ્ચે પીક અવર્સ નોંધાયા હતા, જેમાં બાઈકર્સની સંખ્યા સૌથી વધુ રહી હતી. આ સમયગાળામાં બ્રિજ પર ટ્રાફિકનું દબાણ વધારે હોય છે, જેને ધ્યાનમાં રાખીને સુરક્ષા વ્યવસ્થાઓ વધુ કડક બનાવવામાં આવી છે.

પદયાત્રીઓની અવરજવર પણ નોંધપાત્ર રહી હતી. 24 કલાક દરમિયાન વડોદરાથી આનંદ તરફ 12 લોકો ગયા હતા, જ્યારે આનંદથી વડોદરા તરફ 109 લોકો આવ્યા હતા. આ આંકડાઓ દર્શાવે છે કે બ્રિજ માત્ર વાહનચાલકો માટે જ નહીં પરંતુ પદયાત્રીઓ માટે પણ મહત્વપૂર્ણ માર્ગ બની રહ્યો છે.

મુજપુર પાસે આવેલા જૂના ગંભીરા બ્રિજના ભાગના ધરાશાયી થવાના બનાવ બાદ, આરએન્ડબી વિભાગે તાત્કાલિક પગલાં લઈને બંને જિલ્લાઓ વચ્ચેનો સંપર્ક ફરી શરૂ કર્યો હતો. તૂટેલા ભાગ પર વિશેષ આયર્ન સ્ટ્રક્ચર મૂકીને તાત્કાલિક બ્રિજ તૈયાર કરવામાં આવ્યો છે, જેમાં વિશ્વકર્મા એન્જિનિયરિંગની સહાય લેવામાં આવી હતી.

ડેપ્યુટી એક્ઝિક્યુટિવ એન્જિનિયર અક્ષય જોશીએ જણાવ્યું હતું કે, બ્રિજને ખુલ્લો મુકતા પહેલા લોડ ટેસ્ટિંગ સહિતની તમામ જરૂરી પ્રક્રિયાઓ પૂર્ણ કરવામાં આવી છે. સુરક્ષા માટે બ્રિજના બંને છેડે બેરિકેડિંગ, CCTV મોનિટરિંગ, પોલીસ અને હોમગાર્ડની તૈનાતી કરવામાં આવી છે. ઉપરાંત ક્રેશ બેરિયર્સ, રોડ સેફ્ટી સાઇન બોર્ડ અને લેન ડિવાઇડર્સ પણ લગાવવામાં આવ્યા છે.

વિભાગ દ્વારા તમામ વાહનચાલકોને બ્રિજ પર નિર્ધારિત ગતિ મર્યાદામાં વાહન ચલાવવાની વિનંતી કરવામાં આવી છે, જેથી કોઈ અકસ્માત ન બને અને તમામ લોકો સલામત રીતે અવરજવર કરી શકે.