આંતરરાષ્ટ્રીય મહિલા દિવસ નિમિત્તે જામનગર શહેરના ટાઉનહોલ ખાતે જિલ્લા પંચાયત પ્રમુખ શ્રીમતી મેયબેન ગરસરની અધ્યક્ષતામાં ભવ્ય “મહિલા સંમેલન”નું આયોજન કરવામાં આવ્યું હતું. મહિલા સશક્તિકરણને પ્રોત્સાહન આપવા જામનગર જિલ્લા વહીવટી તંત્ર દ્વારા આ કાર્યક્રમનું આયોજન કરવામાં આવ્યું હતું, જેમાં નારી શક્તિના યોગદાનને ઉજાગર કરવામાં આવ્યું.

વિશ્વભરમાં દર વર્ષે ૮ માર્ચે આંતરરાષ્ટ્રીય મહિલા દિવસની ઉજવણી કરવામાં આવે છે. આ વર્ષની થીમ “Rights, Justice, Action for All Women and Girls” રાખવામાં આવી છે, જેના માધ્યમથી મહિલાઓના અધિકારો, ન્યાય અને સમાનતાના મુદ્દાઓને પ્રાથમિકતા આપવામાં આવી રહી છે.

જામનગર જિલ્લાના કલેક્ટર કેતન ઠક્કરના પ્રેરણાદાયક વિચારને સાકાર કરતા જિલ્લા વહીવટી તંત્ર દ્વારા એક અનોખી પહેલ કરવામાં આવી હતી. સમગ્ર કાર્યક્રમનું સંચાલન માત્ર મહિલાઓ દ્વારા કરવામાં આવ્યું હતું. જિલ્લા વહીવટી તંત્રમાં ફરજ બજાવતી મહિલાઓએ કાર્યક્રમના તમામ પાસાઓનું સફળ સંચાલન કરીને મહિલા સશક્તિકરણનું પ્રેરણાદાયક ઉદાહરણ પૂરું પાડ્યું હતું.

કાર્યક્રમ દરમિયાન સરકારની વિવિધ યોજનાઓનો લાભ મેળવી સ્વનિર્ભર બનેલી મહિલાઓએ પોતાના જીવનના અનુભવો અને સફળતાની કહાનીઓ રજૂ કરી હતી. તેમના પ્રેરણાદાયક અનુભવો સાંભળીને અન્ય મહિલાઓને પણ આગળ વધવા માટે પ્રોત્સાહન મળ્યું હતું.

આ પ્રસંગે મહાનુભાવોના હસ્તે અનેક લાભાર્થી મહિલાઓ અને દીકરીઓને વિવિધ યોજનાકીય લાભો આપવામાં આવ્યા હતા. તેમાં દીકરી વધામણા કીટ, વ્હાલી દીકરી યોજના હેઠળની સહાય, તેમજ રમતગમત ક્ષેત્રમાં ઉત્કૃષ્ટ સિદ્ધિ હાંસલ કરનાર વિદ્યાર્થીનીઓને સન્માનિત કરવામાં આવી હતી. ઉપરાંત મહિલાલક્ષી વિવિધ સરકારી યોજનાઓના લાભ પણ લાભાર્થીઓને એનાયત કરવામાં આવ્યા હતા.

કાર્યક્રમના અંતે બાળકીઓના હસ્તે કેક કટિંગ કરીને મહિલા દિવસની ઉજવણી કરવામાં આવી હતી. સમગ્ર કાર્યક્રમ દરમિયાન મહિલાઓની શક્તિ, આત્મવિશ્વાસ અને સમાજના વિકાસમાં તેમની મહત્વપૂર્ણ ભૂમિકાને ઉજાગર કરવામાં આવી હતી.

આ કાર્યક્રમ દ્વારા મહિલાઓને પ્રોત્સાહન આપવાનો મહત્વપૂર્ણ સંદેશ આપવામાં આવ્યો હતો અને સમાજમાં મહિલા સશક્તિકરણ અંગે જાગૃતિ ફેલાવવા માટે એક સકારાત્મક પગલું સાબિત થયું હતું.