દેશના 77મા પ્રજાસત્તાક દિવસની પૂર્વસંધ્યાએ રાષ્ટ્રપતિ ભવન ખાતે આયોજિત થનારા પરંપરાગત ‘એટ હોમ’ સમારોહ માટે નેશનલ ઇન્સ્ટિટ્યૂટ ઓફ ડિઝાઇન (NID), અમદાવાદ દ્વારા વિશેષ અને અનોખી આમંત્રણ કીટ તૈયાર કરવામાં આવી છે. આ આમંત્રણ કીટ ભારતના ઉત્તર-પૂર્વ પ્રદેશની સમૃદ્ધ હસ્તકલા, સંસ્કૃતિ અને આત્મનિર્ભરતાના ભાવને પ્રતિબિંબિત કરે છે. ‘અષ્ટલક્ષ્મી’ તરીકે ઓળખાતા ઉત્તર-પૂર્વ ભારતના આઠ રાજ્યોની કલા અને પરંપરાને આ કીટમાં સુંદર રીતે રજૂ કરવામાં આવી છે.

NID અમદાવાદની રચનાત્મક દિશા અને સંસ્કૃતિ વિભાગના સંકલનથી કુલ 950 આમંત્રણ કીટ રાષ્ટ્રપતિ ભવનને મોકલવામાં આવી છે. આ કીટ તૈયાર કરવામાં અંદાજે 350થી વધુ કારીગરોએ મહત્વપૂર્ણ ભૂમિકા ભજવી છે. આ સમગ્ર પ્રક્રિયા ‘વોકલ ફોર લોકલ’ અને ‘આત્મનિર્ભર ભારત’ની ભાવનાને ઉજાગર કરે છે, જેમાં પરંપરાગત કારીગરીને આધુનિક ડિઝાઇન સાથે જોડવામાં આવી છે.

આ આમંત્રણ કીટમાં અરુણાચલ પ્રદેશ, આસામ, મણિપુર, મેઘાલય, મિઝોરમ, નાગાલેન્ડ, સિક્કિમ અને ત્રિપુરા જેવા ઉત્તર-પૂર્વ ભારતના રાજ્યોની પરંપરાગત હસ્તકલા અને સાંસ્કૃતિક ઓળખને પ્રસ્તુત કરવામાં આવી છે. દરેક કીટમાં ઉપયોગમાં લેવાયેલા સામગ્રી, રંગો અને ડિઝાઇન આ રાજ્યોની સ્થાનિક કલા, કુદરત અને જીવનશૈલીને પ્રતિબિંબિત કરે છે. બાંસ, કાપડ, હસ્તનિર્મિત કાગળ અને કુદરતી રંગોનો ઉપયોગ કરીને તૈયાર કરાયેલી આ કીટ પર્યાવરણને અનુકૂળ પણ છે.

દરેક આમંત્રણ કીટ સામૂહિક પ્રયાસ, કલાત્મક કુશળતા અને સમુદાયની ભાગીદારીની કહાની કહે છે. કારીગરોની મહેનત અને પરંપરાગત જ્ઞાનને રાષ્ટ્રીય મંચ પર સ્થાન આપીને NID અમદાવાદે ભારતીય હસ્તકલા અને સંસ્કૃતિના સંરક્ષણ તથા પ્રચારમાં મહત્વપૂર્ણ યોગદાન આપ્યું છે.

રાષ્ટ્રપતિ ભવનના ‘એટ હોમ’ સમારોહ માટે તૈયાર કરાયેલી આ આમંત્રણ કીટ માત્ર આમંત્રણ નહીં, પરંતુ ભારતની વૈવિધ્યસભર સાંસ્કૃતિક ધરોહર અને એકતાનું જીવંત પ્રતીક બની છે.