તા. 25 જાન્યુઆરી, રાષ્ટ્રીય મતદાર દિવસના અવસરે બોટાદ જિલ્લાએ દેશભરમાં પોતાનું વિશેષ સ્થાન સ્થાપિત કર્યું છે. મતદાર જાગૃતિ માટે ટેકનોલોજી આધારિત નવીન પહેલ બદલ બોટાદ જિલ્લાને રાષ્ટ્રીય સ્તરનો પ્રતિષ્ઠિત પુરસ્કાર પ્રાપ્ત થયો છે. આ પુરસ્કાર ‘Innovative Voter Awareness Initiatives’ કેટેગરી હેઠળ આપવામાં આવ્યો છે, જે મતદાન પ્રત્યે જનજાગૃતિ વધારવા માટે કરાયેલી અનોખી કામગીરીને માન્યતા આપે છે.

બોટાદ જિલ્લામાં મતદાર જાગૃતિ માટે પ્રથમવાર રોબોટિક્સ ટેકનોલોજીનો ઐતિહાસિક ઉપયોગ કરવામાં આવ્યો હતો. ‘બોટ્રોન’ નામના રોબોટ દ્વારા મતદારોને લોકશાહી પ્રક્રિયા અંગે માહિતગાર કરવાની અનોખી પહેલ કરવામાં આવી, જેને રાષ્ટ્રીય સ્તરે વિશેષ પ્રશંસા મળી છે. આ પહેલ દેશભરમાં પોતાની જાતની પ્રથમ પહેલ ગણાઈ રહી છે.

‘બોટ્રોન’નું ડિઝાઇનિંગ, પ્રોગ્રામિંગ તથા જિલ્લામાં વ્યાપક અમલીકરણ બોટાદ જિલ્લાના કલેક્ટર શ્રી જિન્સી રોયના સીધા માર્ગદર્શન હેઠળ કરવામાં આવ્યું હતું. રોબોટમાં સમાવિષ્ટ તમામ સંદેશાઓ ચૂંટણી પંચ દ્વારા નક્કી અને મંજૂર કરવામાં આવ્યા હતા, જેથી મતદારો સુધી સાચી અને વિશ્વસનીય માહિતી પહોંચાડી શકાય.

બોટ્રોન દ્વારા મતદાર નોંધણી, મતદાર યાદી સુધારણા, નૈતિક મતદાનનું મહત્વ, તેમજ ચૂંટણી કાર્યક્રમ સંબંધિત માહિતીને સરળ અને રસપ્રદ રીતે લોકો સુધી પહોંચાડવામાં આવી. રોબોટિક અવાજ, હાવભાવ અને પ્રદર્શન દ્વારા યુવાનો, પ્રથમ વખત મતદાન કરનારા મતદારો તથા સામાન્ય નાગરિકોમાં વિશેષ આકર્ષણ ઊભું થયું હતું.

આ ટેકનોલોજી આધારિત પહેલના પરિણામે બોટાદ જિલ્લામાં મતદાર જાગૃતિમાં નોંધપાત્ર વધારો થયો હોવાનું નોંધાયું છે. ખાસ કરીને યુવા વર્ગમાં મતદાન પ્રત્યે ઉત્સાહ અને જવાબદારીની ભાવના વિકસી છે.

રાષ્ટ્રીય મતદાર દિવસ નિમિત્તે મળેલ આ એવોર્ડ બોટાદ જિલ્લા માટે ગૌરવની ક્ષણ છે અને ભવિષ્યમાં અન્ય જિલ્લાઓ માટે પ્રેરણારૂપ સાબિત થશે. બોટાદ જિલ્લાની આ નવીન પહેલે સાબિત કરી દીધું છે કે ટેકનોલોજીનો યોગ્ય ઉપયોગ લોકશાહી મજબૂત બનાવવામાં મહત્વની ભૂમિકા ભજવી શકે છે.