નર્મદા જિલ્લામાં ‘બેટી બચાવો બેટી પઢાવો’ યોજના અંતર્ગત જિલ્લા કલેક્ટર શ્રી એસ.કે. મોદીની અધ્યક્ષતામાં કલેક્ટર કચેરીના કોન્ફરન્સ હોલ ખાતે ‘કોફી વિથ કલેક્ટર’ કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય હેતુ જિલ્લાની પ્રતિભાશાળી દીકરીઓને પ્રોત્સાહન આપવાનો અને તેમના અનુભવોથી અન્ય દીકરીઓને પ્રેરણા મળે તેવો સકારાત્મક માહોલ સર્જવાનો હતો.

આ પ્રસંગે રમતગમત, શિક્ષણ તેમજ અન્ય પ્રવૃત્તિઓમાં નોંધપાત્ર સિદ્ધિ પ્રાપ્ત કરનાર કુલ ચાર દીકરીઓને જિલ્લા કલેક્ટર શ્રી એસ.કે. મોદી દ્વારા સન્માનિત કરવામાં આવી હતી. સન્માનરૂપે દીકરીઓને શૈક્ષણિક કીટ, ‘બેટી બચાવો બેટી પઢાવો’ કેપ તેમજ પ્રમાણપત્ર આપવામાં આવ્યા હતા. કાર્યક્રમ દરમિયાન દીકરીઓએ પોતાના જીવનના અનુભવો, સંઘર્ષ અને સફળતાની સફર વિશે વાત કરી હતી, જે ઉપસ્થિત સૌ માટે પ્રેરણાદાયી બની રહી.

જિલ્લા કલેક્ટર શ્રી એસ.કે. મોદીએ આ અવસરે જણાવ્યું હતું કે, નર્મદા જિલ્લાની દીકરીઓ આજે રમતગમત, શિક્ષણ અને વિવિધ ક્ષેત્રોમાં આગળ વધી રહી છે અને જિલ્લા સાથે રાજ્યનું નામ રોશન કરી રહી છે, જે સૌ માટે ગૌરવની બાબત છે. તેમણે દીકરીઓને રાષ્ટ્રીય અને આંતરરાષ્ટ્રીય સ્તરની સ્પર્ધાઓમાં ભાગ લઈ વધુ ઊંચાઈએ પહોંચવા માટે પ્રોત્સાહિત કર્યા હતા. જિલ્લાની આ ‘રત્ન સમાન’ દીકરીઓ ભવિષ્યમાં અનેક માટે આદર્શ બનશે તેવી આશા પણ તેમણે વ્યક્ત કરી હતી.

આ કાર્યક્રમનું આયોજન નર્મદા જિલ્લા મહિલા અને બાળ વિકાસ અધિકારી કચેરી દ્વારા કરવામાં આવ્યું હતું. કાર્યક્રમમાં જિલ્લા વિકાસ ગ્રામ વિકાસ એજન્સીના ડાયરેક્ટર શ્રી વાય.એસ. ચૌધરી, જિલ્લા કાનૂની સેવા સમિતિના પૂર્ણકાલીન સચિવ શ્રી એસ.આર. બટેરિવાલા, નાયબ પોલીસ અધિક્ષકશ્રી તેમજ જિલ્લા મહિલા અને બાળ વિકાસ કચેરીના અધિકારીઓ અને કર્મચારીઓ ઉપસ્થિત રહ્યા હતા.

‘કોફી વિથ કલેક્ટર’ જેવા કાર્યક્રમો દ્વારા દીકરીઓમાં આત્મવિશ્વાસ વધે છે અને સમાજમાં દીકરીઓ પ્રત્યે સકારાત્મક દૃષ્ટિકોણ વિકસે છે. નર્મદા જિલ્લામાં યોજાયેલો આ કાર્યક્રમ ‘બેટી બચાવો બેટી પઢાવો’ યોજનાના ઉદ્દેશોને સાકાર કરતો એક મહત્વપૂર્ણ પ્રયાસ તરીકે નોંધપાત્ર રહ્યો છે.