Editor2
નવસારી મ્યુનિસિપલ કોર્પોરેશન દ્વારા આયોજિત ફૂડ એન્ડ કાઈટ ફેસ્ટિવલ–2025નું સાઈ ગરબા ગ્રાઉન્ડ ખાતે ભવ્ય અને ઉત્સાહભર્યું ઉદ્ઘાટન કરવામાં આવ્યું હતું. કેન્દ્રિય જળશક્તિ મંત્રી અને નવસારીના સાંસદ શ્રી સી. આર. પાટીલ તેમજ ગુજરાત સરકારના આદિવાસી વિકાસ મંત્રી શ્રી નરેશભાઈ પટેલની વિશેષ હાજરીમાં આ મહોત્સવનું ઔપચારિક ઉદ્ઘાટન થયું હતું. શહેરના નાગરિકો, પરિવારજનો અને યુવાનોની વિશાળ હાજરી વચ્ચે ઉત્સવની શરૂઆત ઉત્સાહપૂર્ણ માહોલમાં થઈ હતી.
ઉદ્ઘાટન સમારોહ દરમિયાન નવસારી મ્યુનિસિપલ કોર્પોરેશનની વેબસાઈટ અને “નવસારી કનેક્ટ” મોબાઈલ એપ્લિકેશનનું લોકાર્પણ કરવામાં આવ્યું હતું. આ એપ્લિકેશન દ્વારા નાગરિકોને મહાનગરપાલિકાની વિવિધ સેવાઓ, માહિતી અને સુવિધાઓ સરળતાથી ઉપલબ્ધ થશે. સાથે જ નવસારીના ઐતિહાસિક, સાંસ્કૃતિક અને વિકાસયાત્રાને ઉજાગર કરતી વિશેષ કોફી ટેબલ બુકનું પણ વિમોચન કરવામાં આવ્યું હતું, જેને મહેમાનો દ્વારા બિરદાવવામાં આવી હતી.
ઉદ્ઘાટન પ્રસંગે મંત્રી શ્રી સી. આર. પાટીલે નવસારી જિલ્લામાં વિકાસ, સ્વચ્છતા અને સિંચાઈ ક્ષેત્રે થયેલી નોંધપાત્ર પ્રગતિની પ્રશંસા કરી હતી. તેમણે જણાવ્યું હતું કે સરકાર, પ્રશાસન અને નાગરિકોના સંયુક્ત પ્રયાસોથી આ સિદ્ધિઓ પ્રાપ્ત થઈ છે. વડાપ્રધાન શ્રી નરેન્દ્ર મોદીના માર્ગદર્શન હેઠળ સ્વચ્છતા હવે લોકોની જીવનશૈલીનો અભિન્ન ભાગ બની રહી છે. આગામી સમયમાં નવસારીને દેશના સ્વચ્છ અને સુવ્યવસ્થિત શહેરોમાં અગ્રેસર સ્થાન અપાવવાનો સંકલ્પ પણ તેમણે વ્યક્ત કર્યો હતો.
કાર્યક્રમ દરમિયાન લોકપ્રિય લોકગાયિકા ગીતા રબારીની મધુર અને જીવંત સંગીત પ્રસ્તુતિ ખાસ આકર્ષણનું કેન્દ્ર બની હતી. તેમના લોકગીતોએ સમગ્ર વાતાવરણને ઉત્સાહ અને આનંદથી ભરી દીધું હતું. નાગરિકો, યુવાનો અને બાળકો સહિત સૌએ તાલીઓના ગડગડાટ સાથે તેમની પ્રસ્તુતિને માણી હતી.
આ પ્રસંગે જિલ્લા કલેક્ટર શ્રી ક્ષિપ્રા અગ્રે, મ્યુનિસિપલ કમિશનર શ્રી દેવ ચૌધરી, જિલ્લા વિકાસ અધિકારી શ્રી પુષ્પલતા, નવસારીના ધારાસભ્ય શ્રી રાકેશભાઈ દેસાઈ, નગરપાલિકાના અધિકારીઓ, ચૂંટાયેલા પ્રતિનિધિઓ અને સામાજિક આગેવાનો ઉપસ્થિત રહ્યા હતા. ફૂડ એન્ડ કાઈટ ફેસ્ટિવલ–2025 દ્વારા નવસારી શહેરની સાંસ્કૃતિક ઓળખ અને પ્રવાસનને નવી ઊંચાઈ મળશે તેવી અપેક્ષા વ્યક્ત કરવામાં આવી હતી.
