રાજ્ય સરકારના પ્રવાસન વિભાગ અને દેવભૂમિ દ્વારકા જિલ્લા વહીવટી તંત્રના સંયુક્ત ઉપક્રમે શિવરાજપુર બીચ ખાતે આંતરરાષ્ટ્રીય પતંગ મહોત્સવની ભવ્ય અને રંગબેરંગી ઉજવણી કરવામાં આવી. અરબી સમુદ્રના કિનારે યોજાયેલ આ મહોત્સવે લોકસંસ્કૃતિ, પરંપરા અને ગુજરાતના પર્યટન વૈભવને વૈશ્વિક સ્તરે પ્રસ્થાપિત કરવામાં મહત્વપૂર્ણ ભૂમિકા ભજવી.

આ પ્રસંગે કલેક્ટરશ્રીએ જણાવ્યું હતું કે આંતરરાષ્ટ્રીય પતંગ મહોત્સવ ગુજરાતની સાંસ્કૃતિક ઓળખને દુનિયાભરમાં પહોંચાડતું એક મહત્વપૂર્ણ આયોજન છે. મહોત્સવ દરમિયાન રાષ્ટ્રીય તથા આંતરરાષ્ટ્રીય સ્તરના પતંગ પ્રદર્શન, વિવિધ આકાર અને કદના વિશાળ તથા કલાત્મક પતંગોની આકર્ષક પ્રદર્શની યોજાઈ હતી. સાથે જ લોકસાંસ્કૃતિક કાર્યક્રમો અને પરંપરાગત નૃત્ય-સંગીત દ્વારા મુલાકાતીઓને ગુજરાતની સમૃદ્ધ સંસ્કૃતિનો અનુભવ કરાવવામાં આવ્યો.

આ મહોત્સવમાં આઈ.એન.એસ.ના કમાન્ડિંગ ઓફિસર શ્રી કેપ્ટન શશાંક શર્માએ પોતાના પ્રાસંગિક ઉદ્બોધનમાં દેશ-વિદેશથી આવેલા પતંગ રસિકોને આવકાર્યા હતા અને આવા કાર્યક્રમો દ્વારા પર્યટન તેમજ સાંસ્કૃતિક એકતાને પ્રોત્સાહન મળે છે તેમ જણાવ્યું હતું. મહાનુભાવોના હસ્તે દીપ પ્રાગટ્ય કરીને કાર્યક્રમનો શુભ આરંભ કરવામાં આવ્યો હતો. આ અવસરે પરંપરાગત રાસની મનમોહક પ્રસ્તુતિએ ઉપસ્થિત જનસમૂહને મંત્રમુગ્ધ કરી દીધો.

મહોત્સવનું મુખ્ય આકર્ષણ વિવિધ રાજ્યોના 11 રાષ્ટ્રીય તથા 32 આંતરરાષ્ટ્રીય પતંગબાજો દ્વારા આકાશમાં ઉડાવવામાં આવેલા અનોખા પતંગો રહ્યા. વિવિધ આકાર, રંગ અને કલાત્મક ડિઝાઇન ધરાવતા વિશાળ પતંગોએ શિવરાજપુર બીચના આકાશને રંગીન બનાવી દીધું હતું. દરિયાકાંઠે ઉમટેલા સ્થાનિક નાગરિકો અને પર્યટકો માટે આ દૃશ્ય વિશેષ આકર્ષણનું કેન્દ્ર બન્યું હતું.

આંતરરાષ્ટ્રીય પતંગ મહોત્સવથી દેવભૂમિ દ્વારકાનું પર્યટન મહત્વ વધુ મજબૂત બન્યું છે. આવા કાર્યક્રમો સ્થાનિક અર્થતંત્રને વેગ આપે છે તેમજ ગુજરાતને વૈશ્વિક પર્યટન નકશા પર વિશિષ્ટ સ્થાન અપાવે છે. શિવરાજપુર બીચ પર યોજાયેલ આ મહોત્સવે સંસ્કૃતિ, પરંપરા અને પર્યટનનો સુમેળ રજૂ કરી એક યાદગાર ઉત્સવરૂપ અનુભવ આપ્યો.