માનનીય મુખ્યમંત્રી શ્રી ભૂપેન્દ્રભાઈ પટેલે ગાંધીનગર ખાતે નાયબ મુખ્યમંત્રી શ્રી હર્ષભાઈ સંઘવી, શિક્ષણ મંત્રી શ્રી પ્રદ્યુમનભાઈ વાજા તથા શિક્ષણ રાજ્ય મંત્રી શ્રી રીવાબા જાડેજાની ઉપસ્થિતિમાં રાજ્યની મહત્વપૂર્ણ શૈક્ષણિક યોજનાઓ અંતર્ગત 13 લાખથી વધુ લાભાર્થી વિદ્યાર્થીઓને ₹370 કરોડથી વધુની સ્કોલરશીપ સહાય ડાયરેક્ટ બેનિફિટ ટ્રાન્સફર (DBT) દ્વારા એનાયત કરી. આ કાર્યક્રમ રાજ્યમાં શિક્ષણ ક્ષેત્રે સરકારની પ્રતિબદ્ધતા અને વિદ્યાર્થીઓના સર્વાંગી વિકાસની સ્પષ્ટ ઝાંખી આપે છે.

નમો લક્ષ્મી યોજના, નમો સરસ્વતી વિજ્ઞાન સાધના, મુખ્યમંત્રી જ્ઞાન સાધના મેરીટ સ્કોલરશીપ તથા મુખ્યમંત્રી જ્ઞાનસેતુ મેરીટ સ્કોલરશીપ જેવી યોજનાઓ દ્વારા કે.જી.થી પી.જી. સુધીના વિદ્યાર્થીઓને ગુણવત્તાપૂર્ણ શિક્ષણ સરળતાથી પ્રાપ્ત થાય તે માટે રાજ્ય સરકાર સતત પ્રયત્નશીલ છે. માનનીય મુખ્યમંત્રીશ્રીએ જણાવ્યું કે, શિક્ષણ દરેક બાળકનું મૂળભૂત અધિકાર છે અને માનનીય વડાપ્રધાનશ્રીની કે.જી.થી પી.જી. સુધી શિક્ષણ સુલભ કરવાના સંકલ્પને ગુજરાત સરકાર સફળતાપૂર્વક અમલમાં મૂકી રહી છે.

નાયબ મુખ્યમંત્રી શ્રી હર્ષભાઈ સંઘવીએ કહ્યું કે, વિદ્યાર્થીઓ પર આર્થિક ભારણ ન પડે તેવા આશયથી રાજ્ય સરકાર દ્વારા અનેકવિધ શૈક્ષણિક યોજનાઓ અમલમાં મૂકવામાં આવી છે. આ સ્કોલરશીપ સહાયથી વિદ્યાર્થીઓને અભ્યાસમાં પ્રોત્સાહન મળશે તેમજ ડ્રોપઆઉટ દર ઘટાડવામાં પણ મદદરૂપ થશે.

શિક્ષણ મંત્રીશ્રી અને શિક્ષણ રાજ્ય મંત્રીશ્રીએ પણ આ પહેલને વિદ્યાર્થીઓના ઉજ્જવળ ભવિષ્ય માટે અત્યંત ઉપયોગી ગણાવી હતી. સરકારની આ યોજનાઓથી પ્રતિભાશાળી અને જરૂરિયાતમંદ વિદ્યાર્થીઓને આગળ વધવાની તક મળશે અને ગુજરાત શિક્ષણ ક્ષેત્રે નવી ઊંચાઈ પ્રાપ્ત કરશે.