વાયબ્રન્ટ ગુજરાત રિજનલ એક્ઝિબિશન અંતર્ગત હોલ નં. 1માં ‘ઓશન ઓફ ઓપોર્ચ્યુનિટીઝ’ થીમ પર આધારિત બ્લૂ ઇકોનોમીનું વિશેષ પ્રદર્શન આયોજિત કરવામાં આવ્યું છે, જે મુલાકાતીઓ અને રોકાણકારોમાં વિશેષ આકર્ષણ જગાવી રહ્યું છે. ગુજરાતની સમૃદ્ધ દરિયાકાંઠાની શક્તિ અને સમુદ્ર આધારિત આર્થિક સંભાવનાઓને ઉજાગર કરતું આ પ્રદર્શન રાજ્યના વિકાસની નવી દિશા દર્શાવે છે.

ગુજરાત પાસે આશરે 1,600 કિલોમીટર લાંબો સમૃદ્ધ દરિયાકાંઠો છે, જે દેશના બ્લૂ ઇકોનોમી વિકાસમાં મહત્વપૂર્ણ ભૂમિકા ભજવે છે. આ પ્રદર્શનનું મુખ્ય આકર્ષણ એક વિશાળ જહાજ આકારનો સ્ટોલ છે, જે દરિયાઈ આર્થિક તકોની ઝાંખી રજૂ કરે છે. આ જહાજ મારફતે મેરિટાઇમ, લોજિસ્ટિક્સ, પોર્ટ ડેવલપમેન્ટ, શિપબિલ્ડિંગ અને ઓફશોર ઉદ્યોગોની સંભાવનાઓને જીવંત રીતે રજૂ કરવામાં આવી છે.

ગુજરાત મેરિટાઇમ બોર્ડ દ્વારા આ પ્રદર્શન એક અનોખી પહેલ તરીકે રજૂ કરવામાં આવ્યું છે. જહાજ આકારના સ્ટોલમાં રાજ્યના બંદરોના વિકાસની સફર, પોર્ટ આધુનિકીકરણ, કાર્ગો હેન્ડલિંગ ક્ષમતામાં વધારો અને ઇન્ફ્રાસ્ટ્રક્ચર વિકાસની માહિતી પ્રદર્શિત કરવામાં આવી છે. સાથે સાથે મેરિટાઇમ પ્રોજેક્ટ્સનું લાઇવ ડેમોન્સ્ટ્રેશન અને નવી રોકાણ તકો અંગે વિગતવાર જાણકારી પણ આપવામાં આવી રહી છે.

પ્રદર્શનમાં બ્લૂ ઇકોનોમી અંતર્ગત માછીમારી, સમુદ્ર આધારિત ઊર્જા, ટુરિઝમ, શિપિંગ અને દરિયાઈ વેપાર જેવા ક્ષેત્રોમાં થતી પ્રગતિ અને ભાવિ યોજનાઓ પર ખાસ પ્રકાશ પાડવામાં આવ્યો છે. રોકાણકારો અને ઉદ્યોગકારો માટે આ પ્રદર્શન માહિતીપ્રદ તેમજ પ્રેરણાદાયક સાબિત થઈ રહ્યું છે.

વાયબ્રન્ટ ગુજરાત રિજનલ એક્ઝિબિશનનું આ બ્લૂ ઇકોનોમી પ્રદર્શન ગુજરાતને મેરિટાઇમ હબ તરીકે વિકસાવવાની રાજ્ય સરકારની પ્રતિબદ્ધતાને સ્પષ્ટ કરે છે. ‘ઓશન ઓફ ઓપોર્ચ્યુનિટીઝ’ થીમ સાથે આયોજિત આ પ્રદર્શન રાજ્યના દરિયાઈ સંસાધનોને વૈશ્વિક સ્તરે ઓળખ અપાવવાની દિશામાં મહત્વપૂર્ણ પગલું બની રહ્યું છે.